男人的Fantasy (二四七)黑白
網上資料圖片
香港呢三個月一役，徹底改變咗好多人嘅路。就係「黑白」呢個問題，令好多家庭破裂、友情不再甚至交惡、反目。
好多小朋友稚氣未除就拎起「爭取」嘅旗幟，本來只有玩同瞓嘅暑假，最後變成紅色嘅回憶。
好多人都會問，點算？香港會點算，我哋又會點算？
的確，呢三個月，連我自己都睇清楚好多人嘅道德線同底牌，有啲人口裡中立，其實眼界入面都係立場，呢一種人嚟得更討厭，因為「中立」係佢哋喺呢個風風火火年代入面依然捍衛住嘅假面具，兩邊各有各打就最好，你哋可以搵我做朋友，適當時我先會表少少態，而且仲係限量發售。
有好多人咬牙切齒，大叫：「搞還搞，唔好搞到人搵食丫嘛。」
我經常都話佢哋講得無錯，呢個只係眼界嘅問題，佢依然關心緊未來一個星期嘅事，而一班仲未成年嘅朋友，佢哋講緊係十年甚至係二十年嘅事。回頭一諗，多數大叫「搵食至上」嘅朋友都比我年紀大，我今年四十歲，如果睡眠時間唔夠，過多十年八年，都可以準備做「銀髮族」嘅行列。
所以我明白，唔係唔想望遠啲，係佢哋連自己條命都望唔遠，仲點望香港嘅將來可以望得更遠，可悲又可憐。
呢個根本係一個租約嘅問題，一份協議五十年，講到明每年加幅，你哋住喺呢度可以馬照跑舞照跳，但過吓一年過吓又一年，平時冷氣機壞咗又唔肯整，天花漏水你又話唔關你事，仲成日嚟我度自出自入，門都唔叩一次。
如是者過咗廿年都忍你，突然間有一日話要大幅加租，如果唔肯就入嚟打我。我明白屋係你，過多三十年都係要還，但合約就係合約，如果你呢份合約唔履行，支持佢嘅人，係咪同意世界上所有合約都唔成立？
我係一個生意人，從來都尊重合約，我只係覺得白紙黑字，寫好嘅事就要做好，唔係持住呢十幾年食得大隻咗少少，就衝門入嚟想見人就打，言不通名不順。
但呢個時間你會發現屋企有其他人，一直同你講加比佢啦，轉個頭你先知道原來呢個包租公嘅世界先係你呢個原本家人嘅嚮往，佢哋為咗自己心目中嘅「往外跑」，望住你講黑嘅嘢係白色，被斬嘅人唔夠一部受破壞嘅機器咁重要，隨街有人襲擊平民係唔夠返唔到工咁嚴重，你唔需要勸佢哋，佢哋都知道情況，只係揀咗，永遠都唔會講，因為棍仲未打到佢哋身上。
其實包租公嘅世界，好多人只係心入面自己嚮往，其實根本沾唔上邊。但本來擁有嘅家人，就因為呢件事而永遠割裂，直到其中一方百年歸老，又或者直到其中一方好似二戰時嘅日本兵一樣，突然發現，自己曾經為名利，對自己嘅家園，做過一啲乜嘢錯事。
薛可正Facebook Page
http://www.facebook.com/sithoching
IG：sithoching