男人的Fantasy (二四八)日本足球
網上資料圖片
今日，突然想講吓足球，而且仲要係日本足球。
九十年代，日本聯賽比起而家受歡迎，因為好多啱啱退出國家隊嘅世界級國腳都會去到嗰度搵食，情況同而家嘅澳洲卡塔爾同中超之類聯賽都幾似，因為當時去得日本搵食嘅球星，好多都返唔到主流聯賽。
當中出名嘅有幾位：
史杜高域，﹝八鯨﹞：南斯拉夫近代球王，佢當年仲可以一邊喺日本搵食一邊踢國家隊，可以壓得住效力世界勁旅AC米蘭嘅沙維斯域著國家隊十號，就知佢有幾勁。
米高勞特立﹝神戶﹞：第二個異數，1998年幫丹麥打世界盃嗰時佢都係喺日本搵緊食，佢同佢細佬白賴仁勞特納喺法國世界盃上面嘅表現，應該係直到而家為止，丹麥隊喺世界盃上最亮麗嘅一頁。
鄧加﹝磐田﹞：94、98年世界盃巴西隊隊長，巴西防守足球典範，不過踢波就叻，教波就麻麻。
佐真奴﹝鹿島﹞：94年巴西隊世界盃正選。
巴治禾﹝紅鑽﹞：90年德國隊正選世界盃。
不過勁人入面點都會有啲特別耀眼，當年有一個球員喺94年世界盃16強比賽入面打爆咗美國隊拉莫斯頭骨之後紅牌出場，就好落魄咁去到日本嘅鹿島搵食，以佢當時25歲嘅年紀嚟講，好多人都以為佢好快收皮。
點知呢一位94年巴西隊同白蘭高爭左後衛嘅球員，去到日本之後著起件十號，喺鹿島擔起指揮官嘅角色。嗰一年嘅鹿島嬴咗咩我唔記得，只係記得非常主攻非常好睇，呢位球員對橫濱飛翼仲入過一球金球。
佢一個人喺禁區入面挑過對方五個球員再射入，呢一球亦成為咗當年播精華時必睇嘅片段之一。
後來佢效力鹿島一年，就令人驚喜地重返歐洲球壇去咗聖日耳門，當年聖日耳門仲未好似而家咁係一隊豪門，但重返歐洲聯賽，已經令人非常意外。最後更加盟米蘭，成為克羅地亞球皇波班正選位置主要競爭對手。
收山後佢教過米蘭雙雄，最後返咗去聖日耳門做總監，整個足球生涯都似係驚喜百出，但睇真啲原來又係有跡可尋。
巴西人嚟講佢個樣拍得住卡卡，佢亦擁有一個明星嘅名，佢叫李安納度。
P.S.後來有一個叫侯克嘅變型俠醫，都好似李安納度嘅足跡一樣，由日本，再走返去歐洲最高賽事競技。
今日見到亞洲好多國家都擁有水平唔錯嘅聯賽，更加開始大量招攬唔同國籍嘅球員成為本土國家隊隊員，但比起其他國家早行二十年嘅日本聯賽，反而有一種英雄遲暮嘅感覺，同昔日一出到亞洲比賽就橫掃嘅表現相比，仍然有一段好大嘅距離。
可能世界就係咁樣，合久必分之外，仲會盛極必衰，希望有生之年可以見返呢個童年足球回憶嘅地方，可以重上高峰，上演一幕「衰極重盛」嘅好戲俾我呢個老球迷還個心願。
薛可正Facebook Page
http://www.facebook.com/sithoching
IG：sithoching