男人的Fantasy (二四九)生死
網上資料圖片
香港呢三個月嘅抗爭氣氛，無論你會夢遊定係不問世事；係深黃或者泛藍，都總會受到一定嘅感染。呢種感染令你生活改變，令你作息改變，嚴重嘅可能令你嘅生命改變。
城市入面，好多人都慣性失眠，幾想瞓都瞓唔到；又有啲人好想瞓，但忙到唔夠時間瞓。而香港近來，一般都係「唔願瞓」，因為驚有好多突發嘅事會發生，好怕突然間有壞消息，更加好怕錯過好多好消息。
我都係「唔願瞓」嘅成員，呢三個月無天光都瞓唔到，好多時打開個電腦百無聊賴，我就會上網睇古怪嘅短片。
最後，我睇緊一啲引渡人往生嘅國內短片〈利申；經Youtube的〉。
話說國內一個地方，有一間佛教善終服務嘅佛院，好多重病嘅病人，都會喺人生最尾一段時間，俾家人送到去呢度，走人生最後一段。呢個佛院無咩特別醫療，平房幾間，大量佛法嘅經文同佛畫，病人走入自己嘅房，每日就係俾一班善眾圍住你唸經，近距離俾一張佛畫你睇，耳邊不停同你講，快啲去極樂，唔使牽掛之類。
整個過程可能係幾星期，有啲可能係幾個月，佢哋會將整個過程都拍低，片段入面會見到位病人由精神飽滿，可能鏡頭一跳之後已經係十日之後，身體已經變得明顯地瘦，再一轉又可能係「往生前六小時」，下一鏡，多數已經會係離世之後。
起初時，我會為片入面無時無刻有一班人圍住一位病人叫佢快啲往生而煩悶，覺得如果我係呢位病人一定會唔多快樂，但慢慢我睇過好多條片，好多片入面嘅病人，都喺愈接近死亡時，愈多笑容，又或者係愈誠心唸經。
佢哋唔係因為害怕死亡而唸，而係每一日都有一大班人陪住自己，覺得快樂而唸；又每一日聽到呢一班未死過嘅人講死後極樂有幾好，好多位病人都異口同聲地表示：「我真係好想快啲去極樂」……
不可思議。
然後好多位病人死後，善眾都會為佢換上衣服，再唸經二十四小時。整整一日後，佢哋會屈曲瞓喺床上面呢位先人嘅手腳，嚟顯示佢身體無一般凡人死後嘅僵硬，反而係柔軟有致，好似未過身一樣有彈性。
而好多家人呢個時侯都會依住善眾指示去摸一摸人嘅頭頂，好多個都會帶住微笑點頭，呢一種微笑令人心痛，又令人覺得安慰。
善眾表示，被佛帶走修道嘅先人，全身點樣冰冷，頭頂依然有一股熱流。家屬感應到呢一股熱流，所有人都會滿意快樂咁離開，陪住親人走嘅最後一段路，完美得令人感動。
好多人覺得呢一班病人點解要咁快放棄，走去唔係自己生活嘅地方，過人生最後一段路。但每一個人，生難計死難定，可以控制得到生命入面嘅事，真係寥寥無幾，只要覺得值得，生死只係長短問題，意義先係我哋追求嘅真正目標。
薛可正Facebook Page
http://www.facebook.com/sithoching
IG：sithoching