男人的Fantasy (二五六)《生命中兩個蘇斯克查》
網上資料圖片
我係利迷，點解會講曼聯領隊蘇斯克查，原因好簡單，香港大是大非，球迷都老早連成一線，唔使敵人相視，值得欣賞嘅人，當然要好好記低。
睇上星期曼聯比賽時，一個近鏡影住蘇斯克查，旁述唔止一次咁講「老咗好多」、「老咗好多」…「真係老咗好多」
咁近鏡一睇，又真係歲月不留人，見到蘇斯克查呢個樣，又不期然諗起二十五年前一個星期日。
「喂，尋日個曼聯新外援幾勁，一出場就入兩球。」
「挪威嗰個？」
「係呀，蘇克斯查。」
「蘇斯克查呀。」
「係喎。」
「喂，睇睇吓，蘇斯克查個樣都幾似安仔。」
「係喎，哈哈哈哈哈。」
從此之後，安仔就俾我哋叫佢做蘇斯克查。安仔係一個好好波嘅細路，十二三歲時已經比同年齡嘅細路好波，有一段時間，我朝早同呢個蘇斯克查踢波，去到夜晚，又睇真嗰個蘇斯克查踢波，都幾過癮。
後來，我慢慢大個，無去呢個球場跟隊，我同呢個蘇斯克查慢慢無見。我人生得返一個蘇斯克查，睇住佢踢世界盃，睇佢歐聯決賽一出嚟就入波，睇住佢一路做後備，唯有喺玩Winning嗰時買佢返嚟，比個正選佢做，做我遊戲入面嘅神射手。
我睇住佢由一個細路，嚟到曼聯對住布力般就一戰成名；再睇住佢由年青人，慢慢變成陣中嘅大佬，一世都做後備嘅感覺我唔知道，但我喺佢身上見到咩叫滿足同努力。
2007年，呢個35歲嘅老大哥終於要退休，消失喺我視線，我人生中再無蘇斯克查呢個人。但世界就係咁有趣，呢個時間香港聯賽有一隊叫「香港08」嘅球隊，有一日我見到出賽陣容，竟然見返安仔個名，估唔到無見幾年，佢真係好波到去踢職業。
就係咁，我遙距咁睇住呢個蘇斯克查成長，由佢踢甲組，慢慢變成歌手，直到上到紅館，佢就係C All Star嘅陳健安。
後來我遇返佢，大家都覺我好有趣，十幾二十年前球場相遇，又球場失散。過多幾年，會喺娛樂圈重遇。每一次相遇時我哋都係講返細個時嘅事，我整蠱過邊一個，佢扭過我幾多次，呢份記憶，已經足夠。
近呢一年，真正嘅蘇斯克查又出現喺大眾眼前，每一次睇波，聽到旁述叫佢個名，我比起大家都會諗起多一個人，呢份就係「蘇斯克查」呢個名帶俾我嘅回憶。
近來大是頻繁，雜文一篇，圖個快樂。
薛可正Facebook Page
http://www.facebook.com/sithoching
IG：sithoching