男人的Fantasy (二五七)「最後一夜」
Photo by Justin Law
最近香港每日都有人跳樓同浮屍發現案，喺香港差人連續幾個月嘅濫捕濫權陰影下，令到我哋呢個家，每日都存活喺恐怖氣氛之中。
我成日都諗，如果有人話俾我知，我聽日就無緣無故就要死，我今晚會做咩？
係咪好恐怖，係咪好超現實；但諗真啲，係好恐怖，但已經唔係超現實。
但生命只有一次，任我哋呼天搶地，都只係得一次。
我諗我會即時同最親先食一餐飯，我會多謝媽咪咁多年嚟嘅照顧，多謝細佬成長後嘅陪伴，多謝阿仔又或者同佢打多一次minecraft等等⋯
我或者又會多謝一路以來幫過我嘅人，無論係得意時同失意時嘅，都帶俾我唔同嘅感受，算係我遊歷呢個世界上，最好嘅回憶之一。
之後我會約班老死踢波，場紙炒黃牛都炒唔切，唯有落去叫跟隊。到時應該唔會夠班後生踢，但諗諗吓，其實我後生時都唔係好夠人踢，遊戲一場，無所謂啦。
我由細到大相熟嘅朋友都唔太感性，最多嘢講嘅應該都係我，所以如果要我諗遺言，一日時間應該唔係好夠。所以我可能就咁講句「遲啲見」，既有型得嚟，大家心入面又帶住多少期盼，會再見嘅分離永遠都唔會太傷感，終於明白「再見」呢句嘢嘅威力，老生常談。
爸爸離開世界之前，曾經堅持要去一次「大窩口」。大窩口係爸爸成長嘅地方，我細個搬入屯門之前，爸爸都係住喺大窩口。呢個地方後尾都係阿嫲阿爺嘅居所，一家人過年過節都會返去，開開心心咁過一次年。曾幾何時，去「大窩口」係代表開心、輕鬆、幸福、快樂。
爸爸最後一次去呢個地方時，大多數都係沉默不語，呢度望吓，嗰度又望吓。我望住佢，好似望到佢眼入面，昔日自己每一個留喺呢個地方嘅畫面咁。
呢種舉動，証明我哋都有愛過呢個地方，係一個非常好嘅憑據。
雖然亂世入面，大家都好似唔怕死，只怕死得不明不白。但唔怕死，另一個詮譯就係「好好活」，如果世界咁可愛，大家都要好好過自己日子，唔好有一絲遺憾，唔好錯過身邊好嘅人同好嘅事。
前路仲係好長，香港加油。
薛可正Facebook Page
http://www.facebook.com/sithoching
IG：sithoching