男人的Fantasy (二六二）黃香港
網上資料圖片
七十年代出世，八十年代成長嘅我，成日都會記住細細個住公屋，家家戶戶都打開門瞓覺嘅日子。嗰個年代科技唔係我哋生活嘅一切，左鄰右里經常會見面，人同人之間嘅距離好近，生活得好快樂。
仲記得細個成日聽阿媽講，「會頭」同「開會」呢類字眼，細個唔知道佢哋做乜，大家先知道呢類「會」，其實就係一班鄰居每戶拎啲錢出嚟，集成一個數目後，每個月就由出「利息」最多嘅人去借走呢啲錢嚟應急，再每個月慢慢還錢。
呢一種操作，來自大家嘅信任同感情，來得自然又令關係更好，不過呢個年代，已經好似無咩聽過呢類「會」。
唔知幾時開始，我哋科技愈來愈先進，香港變得愈來愈唔似我細個時候嘅香港。我係一個比較隨意嘅人，時代巨輪下會發生嘅事，我多數都會慢慢適應。
不過我會懷念。
曾經我都以為，我哋下一代會愈來愈冷漠，人同人之間會慢慢失去愛。大家都習慣唔打開門，唔認識隔離屋嘅鄰居，只生活喺自己嘅世界。嗰時好多人都話，香港人溫水煮蛙，年青人溫室太耐，未來嘅香港講到烏雲密佈一樣。
我哋永遠都唔知道，種落一個因，會還我哋一個咩果。
六月運動以嚟，有人形容得好傷感，講到年青人未來都係死路一條，你鬥唔過一個政權，捱唔過一粒子彈。
但，年青人話俾我哋知，呢啲都唔重要。
最重要係，香港人隨住呢五個月嘅成長，憑住一次又一次嘅運動，好多生離死別嘅關口，大家表現出嚟，唔再係冷漠同各家自掃門前雪，而係同心協力，對身邊嘅人甚至係素未謀面嘅路人，毫不猶豫咁作出關心，我唔稱呢啲做單純嘅幫助，因為來自愛嘅念頭，每一點都係關心。
前線需要後援，後援由氛圍支撐，大家每一日起身，都為呢個亂世入面依然存在嘅關心而快樂。我哋都各司其職，可以做就做，由黃店支持，到籌款夠人。好多唔係為咗鬥嬴，為咗爭取更多；更多嘅係想，保護好身邊好多唔認識嘅同路人，可能大家永遠都唔會相見，但知道你我彼此安好，無乜嘢比起呢樣更重要。
香港會點，我唔知道；但香港人已經進步，我好肯定。
以前我愛香港，以後我愛香港人。
薛可正Facebook Page
http://www.facebook.com/sithoching
IG：sithochi