男人的Fantasy (二六六）生活嘅無限可能
網上資料圖片
由下個星期開始，我會多一份兼職，送外賣。
前兩星期，群組入面一班老死都講起，最近市道唔好，大家嘅工作都有多少影響。但當然，我哋會毫無怨言，大是大非之前，我哋可以做嘅就係靠自己去變通，將公家事放喺個人之前，呢啲應該係做人應有嘅觀念。
其中有一個老死講起，宜家受惠於網路進步，其實好多食肆嘅外賣都俾某幾間大營送外賣公司承包，呢度唔係賣廣告，所以名就唔出。不過因為幾間公司都因為起步三幾年，仲係因為市場佔有率而打到頭崩額裂嘅時期，相對上入職嘅員工嘅待遇好似唔錯。
以我朋友為例，佢家住上水，每日返工就係報自己樓下嗰區，衫都唔使換就可以打卡返工，然後慢慢喺屋企食住早餐咁等Order。因為外賣隊分騎兵同步兵關係，所以我老死呢啲步兵所接到嘅單，一般都係一公里以內。
以每單三四十蚊計，大家可能覺得唔係好多，但如果撞正一啲地區你可以去大營連鎖店，一次拎佢三至四單，快快手手送咗佢，就已經有百幾兩百蚊收入。
講到呢度，我群組入面有幾個老死已經有興趣一齊做。
其實一個男人做一個工作，唔同階段真係有唔同追求。開頭時我話我會做，可能你哋覺得我搞笑，但其實呢個階段嘅我，要追求其他嘅可能。我本身係自由工作，一個星期出去三日，其他時間留喺屋企工作，話就話自由，其實就係養懶人。試過幾多次自己因為掛住打機打到唔記得交工作，喺度鬧自己可唔可以成熟啲嘅時候，我都諗緊有冇一啲嘢可以管束吓自己。女人管唔到，最後都係得返錢。如果一份工作，可以令我每日準時起身，落街行一個圈就有一百幾十蚊袋，最緊要有得同班老死喺群組吹吓水傾吓經驗，何樂而不為？
最重要就係，唔使著制服，咁樣可以免除好多麻煩，因為俾街坊見到都唔係太好嘛，哈哈。
我成日都覺得，人生係唔使有框框，我由細到大最自豪就係自己喺屋邨大，令我有足夠謙卑，就算今時今日好多人覺得我係導演，我都認為呢啲虛名唔足夠阻擋我去同一班朋友試吓呢份兼職，當玩又好，當俾自己一個紀律每日早起身都好，都係一個好主意。
只要去登記，拎完制服(之後唔使著)，就可以返工。往後一切交收都喺電話可以做到，要自食其力嘅你哋，都同我一齊試試。話唔定有一日會一齊等餐，可以傾兩句，大家鼓勵一吓。
薛可正Facebook Page
http://www.facebook.com/sithoching
IG：sithochi