男人的Fantasy (二六七）單身貴族
網上資料圖片
拍「起底組」時，喺伍健雄監製工作室入面認識到唔少同行，其中一個就係陳潔玲。
陳潔玲比較似一個男仔，我知道咁樣講係有少少偽善，但身為一個有自知之明嘅男人，我唔會認為靚嘅女人自己都可以有份，所以一個安全嘅距離，係一段友情最好嘅保養。
話佢似男仔，因為佢嘅自強，平素中意傾吓生意經，同佢食飯永遠都比我易話為，佢最花時間嘅地方，就係點樣自強。
早一個星期，約咗陳小姐喺觀塘食飯，一如以往簡單揀好餐廳再簡單食完之後，一落到樓下佢就問我：
「驚唔驚俾人影呀？」
「做乜？」
「你無新聞咩？」
「無呀。」
「呢兩個星期架，自己搵嚟睇下啦。」
返到屋企上網睇下，就見到佢最近一則花邊新聞。睇完之後覺得，呢個世界太多人都唔太認識陳潔玲呢個人。佢係一個天秤座，我唔識計咩月亮星座，但我總係覺得佢有一部份係屬於天蠍，外冷內熱、勤力、記仇、硬頸仲有最重要一樣，乜嘢事都中意靠自己。
有一段時間一班朋友都中意上佢Party House度飲嘢傾吓計，每一次上到去只會見到佢左行右行，有時係計數有時係準備第二日客人要嘅嘢，你叫佢停低唔好做，佢聽你講完十分鐘又係重新再行嚟行去，原因就係因為親力親為先可以俾到佢安全感。
好多時夜晚WhatsApp，見到對方未瞓都會問好一聲，好多時佢都係輕輕兩句，然後又再去做嘢。做老闆就係無事忙，呢種說法唔係無嘢忙，係無一定嘅事會忙，因為一個老闆有幾忙，視乎佢自己投入有幾多。所以一個投放咁多時間去自己事業嘅女人，佢嚮往嘅一定係用自己對手創造出嚟嘅事，如果你依然用金錢去評價佢，呢個係價值觀上嘅差距。
我知道佢嘅過去男朋友，用「有錢」形容好似唔足夠，「顯赫」會比較適合，陳小姐拍拖時會失蹤，情傷時會見見朋友，覺得緣盡時最瀟灑反而係佢自己，然後又好快咁投入自己一盤小生意入面，開開心心咁生活。
所以以我呢啲一介平民去睇，佢係男人眼中最奇異嘅單身貴族，有錢人留佢唔住，但窮嘅都唔使太多幻想，因為要得到佢注意嘅從來都唔係金錢上差距，而係步伐上嘅同感。
如果要為錢卑躬屈膝，又小三又小四咁暗黑過活，呢個又點會係陳潔玲小姐？
薛可正Facebook Page
http://www.facebook.com/sithoching
IG：sithochi