男人的Fantasy (二七四）獨居嘅好處
網上資料圖片
唔係每個人都有機會獨居，喺現今呢個畸形嘅香港經濟環境下，一個人要每個月負責好似洪水猛獸一樣嘅貴租，真係一啲都唔容易。所以要集天時地利同你銀包嘅實力於一身，你先有資格講「獨居」呢兩個字。
人係群居嘅動物，呢一樣我係好同意，因為城市人需求特別多，隔離鄰舍夠多，有咩事起上嚟都有人借吓糖鹽；之但係雖然係要群居，都未使要到兩個人瞓埋一張床咁接近。
好多以為自己好恩愛嘅傻豬去到呢度一定鬧我，兩個人瞓埋一齊都唔知幾開心幾甜蜜呀，你呢啲無骨無血嘅人點會明白。
無錯，瞓前一聲「早抖」，起身一句「早晨」，耐唔耐撞正另一半無M到嘅你仲可以一打開眼就有早餐食，但係呢個情況有幾常見，唔使我問你自己都心裡有數。先唔計夜晚大家啲行雷聲，唔計瞓瞓吓俾佢一腳踢落你度，唔計佢夜瞓啲燈影響你又或者你夜瞓啲燈影響佢再俾佢鬧到你仆街，單單係每一日起身嗰啲有形有主動攻擊力嘅「下床氣」，就已經唔係我哋正常人可以包容嘅範圍之內啦。
所以一個人住第一樣就係瞓覺好，你鐘意早瞓又得，你鐘意唔瞓又可以；瞓嗰時無人嘈你，無人要瞓喺你隻手上面，無人要半夜飲水等等等等，總之就係快活，好簡單之嘛。
平時食飯，係每晚都要食嘅飯，單單係邊個買餸，邊個煮，邊個洗呀，仲有點解又日日食埋同一樣嘢你已經夠煩。男人可以餐餐食豆腐火腩飯，唔關咩男人浪漫事，男人大部份都唔太浪漫，根本就係懶。我行兩步落樓下強記一碟飯加個凍啡64蚊就得，兩個人都係128蚊，唔使買唔使洗唔使煮，有咩唔好呀？
最唔好嘅就係，你敢唔敢同你另一半日日都去食？女人好煩，佢食得唔好又當你唔愛佢架嘞。
仲有最重要一樣嘢，沖涼。
呢排防疫留屋企，好多朋友同我講，一個星期無洗頭爽，三日無沖涼…無比嘅快樂。每一個人一知道道德同衛生水平隨住大環境而拉低就好開心，去露宿唔沖涼唔會有人大叫「點得呀？」，因為個個都唔沖丫嘛，所以呢排好多人都因為成日喺屋企，選擇回歸人類喺原始人時期最基本嘅沖涼次數，七日一次左右啦。
之但係獨居就唔同，如果你係唔鐘意沖涼嘅，你只要唔出街，你係日日都可以唔沖，就算你個頭幾痕，啲頭髮都黏到「一注注」都好，只要無人見到，你就可以唔沖。呢啲係咩呀？係自由呀，你我哋香港人最祟尚嘅自由。
講到咁自由，獨居係唔係好好？其實仲有好多樂趣，寫出嚟係一篇文都唔夠位，只不過，我唔係話人一定要獨居好，只係以我自己經驗，呢個年代嘅愛情觀真係太容易鐘意人，又太容易以為自己搵到你嘅Mr/Ms Right喇，好容易俾其他人進入自己世界，霸佔自己空間，到後來又發覺大家都唔係太愛對方，開始鐘意返自己嘅自由多少少。
倒不如搵一個值得嘅人，好好觀察，大膽假設之後小心選擇，最後先專心一致咁喺下半世每日起身，受佢啲有形有聲嘅「下床氣」仲好啦。
薛可正Facebook Page
http://www.facebook.com/sithoching
IG：sithoching