男人的Fantasy (二八二)真正避疫
圖片來源: CK TSUI
完全估唔到，呢個疫情由年頭玩到年中，睇個樣分分鐘去到年尾。
我哋呢一代人，聽到疫情出現，頭幾秒可能會驚一驚，但轉個頭又帶住「心存僥倖」嘅心態繼續生活，儘管可能已經減少咗，但係好多「必要」要出嘅街，我哋依舊勇者無懼咁走出去。
不過隨住近來嘅再一波爆發，我同我細佬住嘅屋邨都有確診，我又耐唔耐有少少喉嚨痛出現吓，都係要將自己隔一隔，唔可以再「心存僥倖」。
我自己一個住，呢種單獨隔離比較有好處，因為只係我一個人唔好出街唔好返工就可以，基於我本來就唔使返工，所以我只要搞掂自己三餐同孤獨，呢個自我隔離都唔算太辛苦。
其實呢個時刻嘅香港，真係幾十年都唔逢一次，喺我人生中可以陪住香港經歷呢種變化，都想好好咁記錄低佢，第時國泰民安時，都可以拎出嚟同啲孫講，你睇吓你阿爺嗰時，幾咁生人唔生膽。
首先係三餐問題，呢段時間我嘅廚藝真係唔講得笑，進步之快連我自己都覺得驚訝，特別係煮呢個「蕃茄炒蛋」，我夠膽講已經係去到專業水準，好多人話有幾難，我警告你呀細路，唔好落茄膏呀，一落咗就即係承認自己搞唔掂嗰幾個蕃茄，承認你自己嘅能力唔可以令到佢哋發光發熱，要靠啲外來嘅化學嘢。
第二味餸就係梅子蒸豬肉，呢個餸又係要拿捏得好好，如果唔係一係太酸一係太甜，比例一定要啱啱好，咁樣先叫成功。
就係咁，「蕃茄炒蛋」同「梅子豬肉」就好似黃子華嘅阿強同佢阿爺咁，長伴住我呢段時間左右，好在我係金牛座，我中意食一樣嘢係可以食廿年，如果無人攔住我，我係食到死嗰日都得的。
但另一樣要處理嘅，係孤獨，經常一個人生活，自由嘅副作用就係孤獨，無錯你可以打電話，又可以WhatsApp，但始終其他人唔係同你生活，佢哋唔會同你同步，就算你用電話搵到佢哋，佢哋可以俾你嘅就只有係陪伴，而唔係同步。
人之所有要同人生活，就係追求呢種同步嘅感覺，有時可能唔使傾偈，都可以得到一份安全感。
而暫時都係獨居嘅我，搵唔到同我同步嘅人，長時間呢啲生活可能會令人胡思亂想，不過普通人胡思亂想可能唔好，但對一個作家嚟講，胡思亂想絕對係一個刺激靈感嘅好機會。
我希望，可以藉住呢個避疫假期，落實去寫一個故事出嚟，如果成功嘅話，都可以喺呢啲壞事入面嘅一個小快樂。
薛可正Facebook Page
http://www.facebook.com/sithoching
IG：sithoching