2020年05月15日

男人的Fantasy (二七七) 疫情下開舖

2020_05_15_Sit Menclub
 
我成日都話人生要好玩,最覺得奇怪嘅事就應該要做多啲,意料之外永遠都係最失控制,失敗時失控地擔心,成功時失控地快樂。所以我試過做做吓寫字樓去咗做倫敦金,又跟住無啦啦做做吓倫敦金變咗做開餐廳,廚師未學識又走咗去拍戲一樣,條命多多少少有啲順應而生,但每一次如果俾我去揀,我都會揀意外嘅事去做,因為咁樣先最有趣,最冒險。
 
之前搞完BS狼人殺,未算上軌道,但要安排嘅事都準備好,有班兄弟姊妹同我一齊睇住放心哂,我又突然有一日忽發奇想,想開返一間餐廳。不過宜家開業成本實在太高,一間食肆由零到有實在需要太多資金,我將計劃轉一轉,睇吓有冇啲想轉手頂讓嘅舖,最後真係俾我搵到一間,而已仲要喺我中意嘅大坑。
 
好多人會覺得咁樣太搏,但我做生意咁多年,體會到和平盛世嘅生意都唔係行行好做,起碼飲食唔係先。開舖時唔會簽長約俾你唔在講,下下同你簽兩年三年,你夠搵返貨錢定裝修錢?再唔係到你有生意時,佢就日日企你門口好似人口普查咁幫你數人頭,去到一個數唔係有獎,而係到期就加你租,唔好諗住同業主傾,「呢個市你唔租大把人租」呢句嘢我聽過二百次有多。
 
只有喺逆市時,好多生意先有方法發圍,飲食係其中一門,因為好多嘢可以縮減,但食飯我哋永遠都唔會少,只會食平啲唔係食少啲,香港未到去打仗,仲有好多人有錢食飯。
 
加上現時科技發達,電話襟幾個掣就可以搵到各大平台送外賣,由落單送貨收錢都一條龍搞掂,做飲食嘅只需要負責好自己嘅部份就無問題,可以發展嘅空間比起以前嘅小店經營其實大得多。
 
但當我將所有事都搞得七七八八時,之前收到政府公佈一個食群唔可以超過四人聚餐嘅政策,又要枱距要有一點五米距離,好多朋友第一時間問我打算點做,會唔會好影響我嘅計劃。依家放寬到一個食群唔可以超過八人,好多朋友支持,靠BOOKING都叫唔錯,要靠自己再努力去做,同香港一齊努力。
 
其實講真我無因為呢啲所謂政策而煩惱,因為由一開始已經無諗過係一個好嘅環境下起步,明知難做都去試,我老早就準備好所有心理準備。林鄭政府對疫情控制如果做得好,老早就已經關咗封,所以從來都無望過呢個政府可以幫到我乜嘢。再加上如果要講難過,九個月前已經有一班年青人比起我好早就已經難過,相比起我宜家要面對嘅事,我覺得只係九牛一毛。
 
薛可正Facebook Page
http://www.facebook.com/sithoching
IG:sithoching

Read More
2020年05月05日

男人的Fantasy (二七六) 愛情何苦

2020_05_05_sit menclub
 
網上資料圖片
 
小豬嘅感情史鬧得沸沸騰騰,有好多人鬧佢係負心漢同死仆街,呢一點我唔敢否認,如果用世界道德公會所保持嘅水平去睇,佢根本已經要浸豬籠,唔使有呢篇文嘅出現。
 
小豬、同蝴蝶仲有周揚青嘅係一個乜嘢故事?大概就係一個我哋喺呢個世代入面嘅愛情路最佳示範。蝴蝶由「捏泥巴」到跑綜藝最後成為娛百一姐,當中話小豬無出過力我諗無人會信,呢個男人將妳由鄉下妹變成當紅台灣歌視藝人,幫妳由屋企負債到買落幾層樓,佢接近乜嘢都俾妳,就係唔俾名份妳。
 
但蝴蝶就係願意一直死心塌地咁跟住佢,只要有睇過佢哋節目,又或是係蝴蝶出外訪問嘅片段,大概都可以估到小豬呢個人喺蝴蝶心目中嘅地位有幾高。愈得唔到嘅嘢地位就愈高,而呢種得唔到又只不過係麈世間最無價值嘅名份,我同你可以經常見面,金鐘獎係我同你一齊上台拎,個世界仲有乜嘢夠呢啲經歷重要,甚至重要到可以包容周揚青嘅存在。
 
周揚青,大陸官二代,老豆權力大到不得了〈好似係〉,由十年前未做變形金剛前已經迷戀小豬,朋友搭朋友之下識到小豬,長駐台灣一段時間之後,終於攻入小豬嘅世界。
 
好多人話周揚青唔靚,但呢一類變形金剛外型總有一班追隨者,加上小豬唔係搵老婆,從新聞所知道佢嘅戰績嚟睇,佢身邊只要一個可以令佢難以估計嘅穩定伴侶就非常好,周揚青就係呢個人選,因為你永遠估唔到,最重視大陸市場嘅小豬可以因為佢嘅身份而得到幾多方便。呢啲推斷係基於佢哋有愛嘅情況下額外所得到嘅方便,所有嘅事都來得理所當然。
 
至於小豬,有錢、有名氣、靚仔仲要隻手遮天,娛百一哥加上亞洲舞王仲要大陸嘅綜藝天王,呢啲身份唔玩唔通等無錢要借財仔先去玩?我唔敢大膽到話好同意同鼓勵人學佢去玩,我嘅視野大概就係覺得一條魚放喺一隻貓面前,只要無人見到嘅話,轉頭條魚消失咗都應該係合理嘅事。
 
呢一單嘢要打道德就唔使打,我比較有興趣想知呢一段關係入面幾位嘅路會點行。對周揚青嚟講佢嬴咗人生最有型嘅其中一仗,佢講到死嗰日都可以同啲孫講當年你阿婆幾咁有型同果斷,彈指之間收咗一個亞洲天王嘅皮,雖然呢種勝利背後最後都只會夾雜一啲孤寂,但條氣唔順就係唔順。
 
好多人話,如果最後小豬最後同蝴蝶結婚就好,但我覺得呢個反而係一個最唔好亦都係最斷估嘅諗法,對小豬嚟講,蝴蝶只係一個需要存在但唔需要擁有嘅女人,因為佢一定永遠都係存在,所以跟本就唔要擁有。呢一句說話,女人未必會明,但男人心入面嘅劣根性一定會對號入座,但有時好多嘢可以諗但又唔可以講,一於跟住世人嘅道德觀,繼續鬧小豬係人渣敗類拆白黨先可以保命,你老婆一路望住你呀。
 
薛可正Facebook Page
http://www.facebook.com/sithoching
IG:sithoching

Read More
2020年04月22日

男人的Fantasy (二七五) 大坑見

2020_04_21_Sit Menclub
 
網上資料圖片
 
諗咗好耐,應唔應該幫自己出篇廣告文,因為最近我喺大坑頂咗一間餐廳,市道低迷,想賣個硬廣告又好似有欠風骨,不如今篇打個擦邊球,講吓大坑呢個地方。
 
好多年前嘅大坑,真係可以用夜市盛世去形容。細個食嘅消夜,千篇一律都係車仔檔,唔係話唔好味,但總係見唔到突破。食消夜食到想有突破其實係一個層次,直到我二十歲後學人揸車周圍玩,我喺大坑消夜嘅文化入面,終於搵到呢一份突破。
 
首先係環境,由幾條橫街組合成嘅唐樓群,當中唔同特式嘅建築形成每一個轉角位都有佢嘅特式,我仲記得當年部電話啱啱有影相功能,雖然像素好低,但都影低咗唔少回憶。
 
第二就係食物種類多,日本菜、越南、泰國、茶記就連印度都好似有,而且好多都係小店式經營,一班朋友去到食消夜特別開心。好多時都係幾個朋友一人揸一架車,去到見位就泊,開開心心咁食一餐,唔使好似而家咁,坐車又唔夠方便,自己揸車又怕無位,就算有位又怕泊車貴,九十幾個原因,二百幾個顧慮。
 
當年嘅大坑,就係一個可以俾你無後顧咁同朋友相聚嘅好地方`,仲要耐唔耐會見到明星,Eason我都見過幾次,不過每次都唔夠膽上去拎簽名,真失敗。
 
遇正八月,你仲可以見識舞火龍嘅盛大場面,一班人好似過節咁跟住一齊玩,真係幾開心。
 
後來唔知點解,嗰度嘅租愈來愈貴,好多以前嘅小店都做唔住。而我無同班揸車朋友一齊玩好耐,大坑呢個地方曾經喺我生命入面消失過一段時間。直到後來有一次,女朋友要參加維園嘅馬拉松,因為一朝早要五點起身,所以特地喺大坑搵咗一間民宿,就係咁,重回呢個地方嘅我特別唏噓,經過以前同朋友開心聚腳嘅地方已經唔存在,成日都諗,有冇可能再見返呢啲日子。
 
所以機緣之下,我搵到而家嘅舖頭,首要原因係一份親切感,第一次去到已經覺得好想換對拖鞋周圍行,可以無拘束咁食一餐飯,正正係我近年所缺少咗嘅事。
 
廣告我就唔賣咁多,我亦都好期待自己喺大坑嘅日子,呢幾年自由工作太多,日無定時搞到作息都好一般,有一間舖頭可以俾我每日有定時工作,對生活都有好嘅影響,大家睇到呢一篇文,希望你哋有時間都可以嚟大坑食吓飯,區內仲有好多好味同有特色嘅小店,就算唔係幫襯我,你哋都可以幫襯其他架。
 
我哋大坑見。
 
薛可正Facebook Page
http://www.facebook.com/sithoching
IG:sithoching

Read More
2020年04月12日

男人的Fantasy (二七四)獨居嘅好處

2020_04_12_Sit Menclub
 
網上資料圖片
 
唔係每個人都有機會獨居,喺現今呢個畸形嘅香港經濟環境下,一個人要每個月負責好似洪水猛獸一樣嘅貴租,真係一啲都唔容易。所以要集天時地利同你銀包嘅實力於一身,你先有資格講「獨居」呢兩個字。
 
人係群居嘅動物,呢一樣我係好同意,因為城市人需求特別多,隔離鄰舍夠多,有咩事起上嚟都有人借吓糖鹽;之但係雖然係要群居,都未使要到兩個人瞓埋一張床咁接近。
 
好多以為自己好恩愛嘅傻豬去到呢度一定鬧我,兩個人瞓埋一齊都唔知幾開心幾甜蜜呀,你呢啲無骨無血嘅人點會明白。
 
無錯,瞓前一聲「早抖」,起身一句「早晨」,耐唔耐撞正另一半無M到嘅你仲可以一打開眼就有早餐食,但係呢個情況有幾常見,唔使我問你自己都心裡有數。先唔計夜晚大家啲行雷聲,唔計瞓瞓吓俾佢一腳踢落你度,唔計佢夜瞓啲燈影響你又或者你夜瞓啲燈影響佢再俾佢鬧到你仆街,單單係每一日起身嗰啲有形有主動攻擊力嘅「下床氣」,就已經唔係我哋正常人可以包容嘅範圍之內啦。
 
所以一個人住第一樣就係瞓覺好,你鐘意早瞓又得,你鐘意唔瞓又可以;瞓嗰時無人嘈你,無人要瞓喺你隻手上面,無人要半夜飲水等等等等,總之就係快活,好簡單之嘛。
 
平時食飯,係每晚都要食嘅飯,單單係邊個買餸,邊個煮,邊個洗呀,仲有點解又日日食埋同一樣嘢你已經夠煩。男人可以餐餐食豆腐火腩飯,唔關咩男人浪漫事,男人大部份都唔太浪漫,根本就係懶。我行兩步落樓下強記一碟飯加個凍啡64蚊就得,兩個人都係128蚊,唔使買唔使洗唔使煮,有咩唔好呀?
 
最唔好嘅就係,你敢唔敢同你另一半日日都去食?女人好煩,佢食得唔好又當你唔愛佢架嘞。
 
仲有最重要一樣嘢,沖涼。
 
呢排防疫留屋企,好多朋友同我講,一個星期無洗頭爽,三日無沖涼…無比嘅快樂。每一個人一知道道德同衛生水平隨住大環境而拉低就好開心,去露宿唔沖涼唔會有人大叫「點得呀?」,因為個個都唔沖丫嘛,所以呢排好多人都因為成日喺屋企,選擇回歸人類喺原始人時期最基本嘅沖涼次數,七日一次左右啦。
 
之但係獨居就唔同,如果你係唔鐘意沖涼嘅,你只要唔出街,你係日日都可以唔沖,就算你個頭幾痕,啲頭髮都黏到「一注注」都好,只要無人見到,你就可以唔沖。呢啲係咩呀?係自由呀,你我哋香港人最祟尚嘅自由。
 
講到咁自由,獨居係唔係好好?其實仲有好多樂趣,寫出嚟係一篇文都唔夠位,只不過,我唔係話人一定要獨居好,只係以我自己經驗,呢個年代嘅愛情觀真係太容易鐘意人,又太容易以為自己搵到你嘅Mr/Ms Right喇,好容易俾其他人進入自己世界,霸佔自己空間,到後來又發覺大家都唔係太愛對方,開始鐘意返自己嘅自由多少少。
 
倒不如搵一個值得嘅人,好好觀察,大膽假設之後小心選擇,最後先專心一致咁喺下半世每日起身,受佢啲有形有聲嘅「下床氣」仲好啦。
 
薛可正Facebook Page
http://www.facebook.com/sithoching
IG:sithoching

Read More
2020年03月25日

男人的Fantasy (二七三)打台的藝術

2020_03_25_Sit Menclub
 
網上資料圖片
 
最近除咗狼人殺,最沉迷都係去旺角CGA打台。喺呢度要解釋一吓,「打台」個名好似好有型,但其實就係大家心目中嘅「夾公仔」;但又要咁講,你哋心目中嘅夾公仔,睇上去同打台差唔多,實際發展到今時今日,夾公仔已經唔再局限於以前嘅夾公仔,而係好多千變萬化嘅玩法。
 
之前其實都有講過,夾公仔機一般都會大規模出現喺一個經驗轉差嘅地方,今時今日嘅香港,正好就係呢一種玩意嘅滋潤地。原因無他,香港本來舖租已經好貴,一遇到乜嘢經濟問題,一街死舖就即時出現,夾公仔店多數都唔使咩裝修,放啲機入去幾乎就可以做生意,令到呢一個行業呢一兩年突然出現喺香港,而且仲大受歡迎。
 
男人打台,其實就係一種競技,係男人同男人之間嘅鬥法,亦係台主同打台客人嘅決鬥。你將部機Set到有幾勁都好,我嚟到可以用最有限嘅錢夾走你件貨,就代表我嬴咗你,呢種決鬥有多少無謂,夾到嘅貨亦未必係自己中意,但出貨嗰吓虛榮感就係開心,就好似一個足球員入波一樣,你未入過波我真係形容唔到俾你聽。
 
而開首時講過我去CGA,其實CGA係一間電競館,呢篇文亦唔係乜嘢廣告,而係當全台灣嘅公仔機都停留喺地方文化時,香港嘅CGA已經將公仔機引入到電競館,將時下年青人嘅娛樂重組再整合,總之後生仔入到去就唔願走,就係咁簡單。
 
而我去CGA嘅機緣亦都係朋友,因為一班朋友喺嗰度做台主,所以成日都會去搵佢哋傾傾計。當我試過一次打台之後,我已經即時沉迷。其實原因都唔係好難明,以前一班男人要出去玩,實要搵一兩間酒吧飲返三幾個鐘,最後一人使兩三千蚊又飲到成肚酒咁醉住返屋企,又辛苦又無謂。
 
宜家我落到去打台,二三千蚊基本上已夠你打一兩晚,而且仲開開心心同朋友有傾有講,分分鐘仲有獎品俾你打到,笑住咁樣返屋企。係,我上面都講過你打到嘅獎品可能好無謂,可能係一隻海賊王嘅FIGURE,又可能係一隻毛公仔,但點都好過個肚載住一肚酒咁返去,嘔得出又辛苦,嘔唔出又失眠,嚟到呢度,一定係笑住嚟笑住走,仲有咩好玩得過咁?
 
打台嘅藝術,同生活嘅藝術都係一樣,唔係過程入面點樣,而係你經歷完後你得到乜嘢,你認為值唔值得,如果有一樣玩意你係每日都玩,玩完又唔會後悔,仲愈玩愈開心,咁你就唔好理人點諗,去做自己中意做嘅嘢,人生得意時,記得要需盡歡。
 
薛可正Facebook Page
http://www.facebook.com/sithoching
IG:sithoching

Read More