2020年01月17日

男人的Fantasy (二六七)單身貴族

2020_01_17_Sit MenClub
 
網上資料圖片
 
拍「起底組」時,喺伍健雄監製工作室入面認識到唔少同行,其中一個就係陳潔玲。
 
陳潔玲比較似一個男仔,我知道咁樣講係有少少偽善,但身為一個有自知之明嘅男人,我唔會認為靚嘅女人自己都可以有份,所以一個安全嘅距離,係一段友情最好嘅保養。
 
話佢似男仔,因為佢嘅自強,平素中意傾吓生意經,同佢食飯永遠都比我易話為,佢最花時間嘅地方,就係點樣自強。
 
早一個星期,約咗陳小姐喺觀塘食飯,一如以往簡單揀好餐廳再簡單食完之後,一落到樓下佢就問我:
 
「驚唔驚俾人影呀?」
 
「做乜?」
 
「你無新聞咩?」
 
「無呀。」
 
「呢兩個星期架,自己搵嚟睇下啦。」
 
返到屋企上網睇下,就見到佢最近一則花邊新聞。睇完之後覺得,呢個世界太多人都唔太認識陳潔玲呢個人。佢係一個天秤座,我唔識計咩月亮星座,但我總係覺得佢有一部份係屬於天蠍,外冷內熱、勤力、記仇、硬頸仲有最重要一樣,乜嘢事都中意靠自己。
 
有一段時間一班朋友都中意上佢Party House度飲嘢傾吓計,每一次上到去只會見到佢左行右行,有時係計數有時係準備第二日客人要嘅嘢,你叫佢停低唔好做,佢聽你講完十分鐘又係重新再行嚟行去,原因就係因為親力親為先可以俾到佢安全感。
 
好多時夜晚WhatsApp,見到對方未瞓都會問好一聲,好多時佢都係輕輕兩句,然後又再去做嘢。做老闆就係無事忙,呢種說法唔係無嘢忙,係無一定嘅事會忙,因為一個老闆有幾忙,視乎佢自己投入有幾多。所以一個投放咁多時間去自己事業嘅女人,佢嚮往嘅一定係用自己對手創造出嚟嘅事,如果你依然用金錢去評價佢,呢個係價值觀上嘅差距。
 
我知道佢嘅過去男朋友,用「有錢」形容好似唔足夠,「顯赫」會比較適合,陳小姐拍拖時會失蹤,情傷時會見見朋友,覺得緣盡時最瀟灑反而係佢自己,然後又好快咁投入自己一盤小生意入面,開開心心咁生活。
 
所以以我呢啲一介平民去睇,佢係男人眼中最奇異嘅單身貴族,有錢人留佢唔住,但窮嘅都唔使太多幻想,因為要得到佢注意嘅從來都唔係金錢上差距,而係步伐上嘅同感。
 
如果要為錢卑躬屈膝,又小三又小四咁暗黑過活,呢個又點會係陳潔玲小姐?
 
薛可正Facebook Page
http://www.facebook.com/sithoching
IG:sithochi

Read More
2020年01月02日

男人的Fantasy (二六六)生活嘅無限可能

2020_ sit_menclub_man chances
 
網上資料圖片
 
由下個星期開始,我會多一份兼職,送外賣。
 
前兩星期,群組入面一班老死都講起,最近市道唔好,大家嘅工作都有多少影響。但當然,我哋會毫無怨言,大是大非之前,我哋可以做嘅就係靠自己去變通,將公家事放喺個人之前,呢啲應該係做人應有嘅觀念。
 
其中有一個老死講起,宜家受惠於網路進步,其實好多食肆嘅外賣都俾某幾間大營送外賣公司承包,呢度唔係賣廣告,所以名就唔出。不過因為幾間公司都因為起步三幾年,仲係因為市場佔有率而打到頭崩額裂嘅時期,相對上入職嘅員工嘅待遇好似唔錯。
 
以我朋友為例,佢家住上水,每日返工就係報自己樓下嗰區,衫都唔使換就可以打卡返工,然後慢慢喺屋企食住早餐咁等Order。因為外賣隊分騎兵同步兵關係,所以我老死呢啲步兵所接到嘅單,一般都係一公里以內。
 
以每單三四十蚊計,大家可能覺得唔係好多,但如果撞正一啲地區你可以去大營連鎖店,一次拎佢三至四單,快快手手送咗佢,就已經有百幾兩百蚊收入。
 
講到呢度,我群組入面有幾個老死已經有興趣一齊做。
 
其實一個男人做一個工作,唔同階段真係有唔同追求。開頭時我話我會做,可能你哋覺得我搞笑,但其實呢個階段嘅我,要追求其他嘅可能。我本身係自由工作,一個星期出去三日,其他時間留喺屋企工作,話就話自由,其實就係養懶人。試過幾多次自己因為掛住打機打到唔記得交工作,喺度鬧自己可唔可以成熟啲嘅時候,我都諗緊有冇一啲嘢可以管束吓自己。女人管唔到,最後都係得返錢。如果一份工作,可以令我每日準時起身,落街行一個圈就有一百幾十蚊袋,最緊要有得同班老死喺群組吹吓水傾吓經驗,何樂而不為?
 
最重要就係,唔使著制服,咁樣可以免除好多麻煩,因為俾街坊見到都唔係太好嘛,哈哈。
 
我成日都覺得,人生係唔使有框框,我由細到大最自豪就係自己喺屋邨大,令我有足夠謙卑,就算今時今日好多人覺得我係導演,我都認為呢啲虛名唔足夠阻擋我去同一班朋友試吓呢份兼職,當玩又好,當俾自己一個紀律每日早起身都好,都係一個好主意。
 
只要去登記,拎完制服(之後唔使著),就可以返工。往後一切交收都喺電話可以做到,要自食其力嘅你哋,都同我一齊試試。話唔定有一日會一齊等餐,可以傾兩句,大家鼓勵一吓。
 
薛可正Facebook Page
http://www.facebook.com/sithoching
IG:sithochi

Read More
2019年12月24日

男人的Fantasy (二六五)人血饅頭

2019_12_24_Sit
 
網上資料圖片
 
可能係我固執,亦都可以話我堅持,我覺得愈大嘅事,就要愈認清重心所在,連目標都唔認清,再大嘅想法都只係徒勞。
 
朋友早前問我,想唔想買印有「光復香港」嘅利是封,講完仲要細細聲講句:「40蚊20個,成本價無賺錢。」
 
「唔使喇。」我笑一笑,再拒絕。
 
佢追住問我點解,我無應佢,輕輕拉開話題。
 
唔答佢係因為基於兩個原因,唔買呢啲利是封,都係因為呢兩個原因。
 
第一,我唔明白點解要出咁多呢啲利是封、電話殼、T恤仲有各類精品。好多人話,傳達一個訊息,將一啲口號傳開去,我同意,呢個想法非常之好。
 
但點解要印成不同商品?
 
咁樣講好似有少少一網打盡,個別一直為運動而做文宣嘅設計師賣呢類產品我係同意,因為佢哋嘅存在令好多感動人心嘅文宣同畫出現,的確可以做到振奮嘅效果,不過……
 
拎人哋嘅字同畫隨便做產品嘅又係到底為咩?
 
就好似大早幾個月前我有質問過鄒凱光啲be water Tee,298蚊一件,仲要講到因為印得少所以成本高,明明就係社會事件而引發嘅事,所有嘅錢當然係第一時間幫返因為反送中入面而被捕同受影響嘅人,點解要變咗消化一啲本來就無需要嘅高成本?
 
如果想要口號傳遞,其實下載一張圖,做你手提電話桌面,只要你每次打開電話都可以見到,真係要大費周章?咁樣講可能有少少霸道,但我哋唔係高牆一方,雞蛋之所以係雞蛋,係因為我哋雖然力有不足但意志堅定,係有溫度又有生命嘅一方。
 
既然力有不足,我哋更需要嘅係全力支援。如果400個利是封嘅錢可以幫到手解決一次醫藥費,200個利是封可以幫佢哋搵到一晚地方借宿,唔係仲有意義?
 
可能呢啲係我個人嘅想法,大家未必認同,所以上文講到,我仲有第二個原因。
 
呢場運動入面嘅聲音太多,有時我自己都會覺得好煩,所以就算同路人有咩問題,我都會盡量少出聲。唔產生分歧,唔延續爭拗,要討論都可能係同朋友私下討論,唔想事事都放上公眾,對整件事都唔見得有好處。
 
但「人血饅頭」其實仲有唔少人食緊,希望大家覺得係一條財路之前諗一諗,為我哋付出嘅手足,佢哋失去幾多血汗,放棄幾多嘢先可以令運動行到呢步,將心比己,落筆之時正係冬至,我哋開開心心食飯時,又有幾多家庭係唔齊整?
 
薛可正Facebook Page
http://www.facebook.com/sithoching
IG:sithochi

Read More
2019年12月15日

男人的Fantasy (二六四)泰國KOL

download-1
 
網上資料圖片
 
我中意上網亂睇嘢,已經唔係新聞,不過因為個人比較黑暗,所以揀親嘅都係Dark嘢。最近好中意睇一個泰國先人化妝師,佢用Facebook將佢工作照整齊咁排好,每日一則,非常有趣。
 
講得先人化妝,好多人以為佢只係影吓化妝品同葬禮?錯喇,佢係成個先人影出嚟,而且因為泰國有好多志願隊會幫地方警察執行交通意外清理,而呢位化妝師亦都係成員之一,所以好多時佢嘅工作照,會由先人意外離世一刻,到用自己架貨車運屍再到化妝過程都會一一拍低,非常細心,但當然,太血腥佢都係會用個薄格輕輕咁擋一擋的。
 
睇咗佢半年,好多時佢喺先人照入面,都會用泰文加一啲描述,先人係何戶人家,點解離開,最後會加一句祝福語。喺佢嘅Facebook入面,我學到兩年事,第一就係原來一個人過世,用最快方法出殯係最好。相入面好多死者都係隔一日就出殯,無論係點樣離世都好,觀感都會好似瞓著一樣,我諗呢樣可以俾到家人一個最好嘅感覺。
 
第二就係佢嘅敬業,佢經常都會用自己嘅工作對世人做一啲勸慰,唔好酒駕、唔好犯事、唔好大意過馬路,好多時都會影到佢笑容滿面,明明係一件略略悲傷嘅事,都可以有唔同嘅意義。
 
而已佢係一個單親爸爸,佢有一個大約八歲嘅仔仔,而佢仔仔經常會跟住佢工作,爸爸化妝時佢就會幫先人解下布,有時會坐到好埋陪住佢爸爸。如果喺世俗入面一定會話細路仔點解唔好好讀書,但佢爸爸用呢種身教,唔係就係一種好好嘅學習咩?
 
每一次睇佢更新我都會細味,因為佢嘅工作就好似濃縮咗嘅人生一樣,有時佢會放吓仔仔細個嘅相,有時會係兩父子喺先人身邊一齊食飯,有時會係佢嘅感慨。生死病死,親情友愛,每一日都喺佢身邊不停發生,但佢依然一臉笑容,係一個好好嘅學習對象。
 
香港朋友梓樂葬禮之日,網上睇到好多朋友前往拜祭,非常感慨。但我希望凡事總有兩邊,梓樂為我哋付出嘅,我哋好好記住;同時我哋都會最感恩嘅心,祝願梓樂可以永遠安息,我哋會永遠都記得你。
 
薛可正Facebook Page
http://www.facebook.com/sithoching
IG:sithochi

Read More
2019年12月09日

男人的Fantasy (二六三)亂世中願望

2019_12_09_Sit MenClub
 
網上資料圖片
 
利物浦十二月初就喺英超榜上領先十分,遙遙帶出一眾列強,我諗住所有利迷從來都無諗過嘅事。
 
可惜一件咁不可思議嘅事,被另一件更加難以想像嘅事掩蓋,香港連續六個月嘅運動,早已經令好多利迷每個星期六都唔可以安心睇波,就算見到球隊嬴波,都難以真正開顏。
 
呢種感覺總係五味紛陳,最美好嘅事遇上香港最難過嘅事,好多時因為唔想處理情緒,我都選擇唔睇波。
 
利物浦全取三分,我都仲未嚟得切笑,已經見到另一邊新聞直播傳嚟令我難以接受嘅濫捕濫打嘅畫面。
 
喺呢度想同有睇呢篇文嘅藍絲講一句,呢篇文係用我感受出發,你唔覺得嗰啲係濫捕嘅自己寫一篇,唔使理我,你好煩。
 
就係咁,呢四個月嚟,每個星期末都喺苦甜間遊走,有時想同利記同好討論一下賽後,但根本完全無心情。以前IG STORY會見到嘅嬴波人浪,宜家可能只會喺歐聯深夜時先會偶然出現。
 
最壞嘅時勢下,出現最好嘅事,到底係唔係一個啟示?
 
曾經做利迷係一個好麻木嘅身份,每年都徘徊三至七位,每年都傾下年可唔可以打歐聯,最接近冠軍一次,由隊長謝拉特一個失誤放走,我對呢一幕無咩感覺,因為犯錯係每一個人都會出現,呢一腳佢比我痛千倍百倍。
 
由曾經麻木入面,去到現任領隊高普出現,陣痛之後見到重返正軌,然後係今年嘅盛世。好似話俾我哋知,每一件事都有一個週期,光又好黑又好,呢個循環都一定會出現。雖然可能好似利物浦咁長達廿年,但期望嘅一定會出現。
 
最重要係喺黑暗時,我哋大家都依然堅持,將係哋口中「最愛」嘅一直進步到底,遇到高低遇到陰晴,握喺手入面嘅都唔好放鬆,呢一種想法,係我哋唯一對待最重要嘅事嘅信念,要相信自己,亦都要相信有天晴。
 
最近,香港嘅運動稍稍有曙光,就算未知有咩結果,但總叫得到外界更多人嘅關心。得到呢個透氣嘅機會,令我更加知道,堅持嘅重要。
 
喜歡利物浦二十五年,令我堅持;
身為香港人四十年,令我更加堅持。
 
利物浦加油,
香港人加油。
 
薛可正Facebook Page
http://www.facebook.com/sithoching
IG:sithochi

Read More