2019年12月02日

男人的Fantasy (二六二)黃香港

2019_12_02_ Sit MenClub
 
網上資料圖片
 
七十年代出世,八十年代成長嘅我,成日都會記住細細個住公屋,家家戶戶都打開門瞓覺嘅日子。嗰個年代科技唔係我哋生活嘅一切,左鄰右里經常會見面,人同人之間嘅距離好近,生活得好快樂。
 
仲記得細個成日聽阿媽講,「會頭」同「開會」呢類字眼,細個唔知道佢哋做乜,大家先知道呢類「會」,其實就係一班鄰居每戶拎啲錢出嚟,集成一個數目後,每個月就由出「利息」最多嘅人去借走呢啲錢嚟應急,再每個月慢慢還錢。
 
呢一種操作,來自大家嘅信任同感情,來得自然又令關係更好,不過呢個年代,已經好似無咩聽過呢類「會」。
 
唔知幾時開始,我哋科技愈來愈先進,香港變得愈來愈唔似我細個時候嘅香港。我係一個比較隨意嘅人,時代巨輪下會發生嘅事,我多數都會慢慢適應。
 
不過我會懷念。
 
曾經我都以為,我哋下一代會愈來愈冷漠,人同人之間會慢慢失去愛。大家都習慣唔打開門,唔認識隔離屋嘅鄰居,只生活喺自己嘅世界。嗰時好多人都話,香港人溫水煮蛙,年青人溫室太耐,未來嘅香港講到烏雲密佈一樣。
 
我哋永遠都唔知道,種落一個因,會還我哋一個咩果。
 
六月運動以嚟,有人形容得好傷感,講到年青人未來都係死路一條,你鬥唔過一個政權,捱唔過一粒子彈。
 
但,年青人話俾我哋知,呢啲都唔重要。
 
最重要係,香港人隨住呢五個月嘅成長,憑住一次又一次嘅運動,好多生離死別嘅關口,大家表現出嚟,唔再係冷漠同各家自掃門前雪,而係同心協力,對身邊嘅人甚至係素未謀面嘅路人,毫不猶豫咁作出關心,我唔稱呢啲做單純嘅幫助,因為來自愛嘅念頭,每一點都係關心。
 
前線需要後援,後援由氛圍支撐,大家每一日起身,都為呢個亂世入面依然存在嘅關心而快樂。我哋都各司其職,可以做就做,由黃店支持,到籌款夠人。好多唔係為咗鬥嬴,為咗爭取更多;更多嘅係想,保護好身邊好多唔認識嘅同路人,可能大家永遠都唔會相見,但知道你我彼此安好,無乜嘢比起呢樣更重要。
 
香港會點,我唔知道;但香港人已經進步,我好肯定。
 
以前我愛香港,以後我愛香港人。
 
薛可正Facebook Page
http://www.facebook.com/sithoching
IG:sithochi

Read More
2019年11月25日

男人的Fantasy (二六一)狼人殺計劃

2019_11_25_Sit MenClub
 
網上資料圖片
 
之前都有講過,我最近非常沉迷「狼人殺」呢個玩意。除咗大是大非要做正經事之外,每個星期我都會約一班朋友去玩。
 
每一次玩完,心情好好多,返到屋企又瞓得好好,絕對係呢段時間調節生活嘅最好活動。
 
接觸「狼人殺」前,我從來都無玩過桌遊,連我個咁中意三國歷史嘅人連「三國殺」都無玩過,就知我對桌遊知識有幾貧乏。自從年頭睇完台灣「凹嗚狼人殺」之後,簡直係驚為天人,點解十個人坐喺度一人拎一隻牌,可以有咁多變化咁好玩,搞到我每晚都搵好多唔同地方嘅狼人殺短片補習。
 
喺呢大半年,同我一齊玩過嘅朋友,年齡層都幾廣,由十歲到五十歲都有,大家都無分年齡咁坐埋一齊,玩得開開心心,喺呢個每三年就一個代溝嘅世代入面,都係一個幾有趣嘅現象。
 
因為呢個遊戲好簡單,講頭腦、講邏輯仲有講表達。玩得叻,無論你係醬爆定八兩金咁嘅外表,都會得到所有人嘅認同,每一個玩家都會用「高玩」即係高級玩家去稱呼你,呢份榮譽同滿足感,係每一位玩狼人殺嘅朋友都一定會暗暗嚮往嘅,
 
除非你想日日做蠢人。
 
呢一個單純較量又容易進行嘅聯絡,喺有爸爸身份嘅我眼中,仲有一種意義。時下小朋友玩電子產品已經太多,唔肯表達幾乎係我哋每一位家長都要擔心嘅事,可能你嘅小朋友都仲係好中意表達,但總括嚟講,肯表達嘅小朋友少咗,相對地整個氣氛都唔會咁好。
 
所以嚟緊,我想做一系列嘅計劃,將呢種咁有趣但喺香港未算普及嘅玩兒介紹俾所有人。我希望小朋友可以當佢係日常朋友見面嘅遊戲,老人家都可以當佢係麻雀,用嚟練習吓頭腦,都係一個唔錯嘅選擇。
 
多謝一班幕前好朋友,喺我乜都未計劃好時,成日聽我講啲唔知會唔會成功嘅事。又當我需要搵人陪玩時,又每個星期都搵一日同我玩到半夜三更,呢個遊戲,的確喺我嚟講別有意義。
 
喺呢個每日都睇新聞睇到就嚟崩潰時,我每日都會抽一個鐘出嚟睇睇狼人殺。因為路仲係好長,當前要盡力抗爭,但生活依然要繼續,我好想準備好一個開心嘅地方,等大家完成使命之後,可以好好咁開心一吓,不枉大家呢幾個月嘅血汗。
 
薛可正Facebook Page
http://www.facebook.com/sithoching
IG:sithochi

Read More
2019年11月16日

男人的Fantasy (二六零)不割的藝術

unnamed-2
 
圖片來源:明報
 
人類對感情的維繫,大部份都被情商帶動。心情愉悅順暢,萬事好商量,如果事情不太貼身,偶然當當好人也未嘗不可:但如果事情發生在自己著眼的地方,人腦裡面衝動的性格總會叫你做出一些隨意的決定,特別是人與人之間,地球上有七十三億人口,少了你一個就一個,給我滾。
 
所以我們要做到「不割」,其實只是取決於心入面一把天秤。
 
不能並存就只取其一,這些東西只是打排序的問題,你喜歡小玲比小麗多,你自然會與小麗割蓆「表面上」。這把戲跟現在很多黃藍店概念一樣,一邊哭著被人打壓成「藍」,但另一邊卻三緘其口,死也不說一句「五大素球」來自証。這個年代,你的廚房不會煮這道「五大素球」,在香港的飲食業會很難生存。
 
選擇,永遠是很真誠,也騙不了人。
 
所以每一次遇上不同意見,大家都喊著不要像從前一樣犯錯。這個說法我同意,錯誤第一次犯是年青,第二次犯已經是平庸,再多犯一次就是白痴。五年前一個活生生的個案供我們參考,如果這樣也吸收不了經驗的話,我們要付出的代價,比起變成白痴更大。
 
「不割」,首要的條件我覺得是謙卑,不要有自我良好的感覺,別以「階段勝利」為口糧,不要將目光短視得像傳統民主派一樣,他們每個月有十萬人工,我們沒有的。
 
這五個多月,香港人都做了很多不可思議的事,進化程度快得驚人,近十年大家總愛說的「溫水煮蛙」,老早已經跳出溫水,會變成什麼尚未知道,但肯定是令我們香港人驕傲的東西。
 
想著這五個月來發生的事,暴政下開過的槍、死了的香港人、尚未見光的無頭命案、7218311111、女義士被非禮等等等等,有一日你遇到道上不同意見的人,你跟他因為一件事而面紅耳熱,請緊記以上所說的事,將它們置於天秤的左邊,然後你右邊再放什麼東西都已經不重要,世界上沒有事,比起這五個月我們一起面對的還要更重要。
 
我們都曾經為了一時之氣而失去很多,但我們不能再失去更多,拿著以前的經驗,走向未來的道路,目標一致,看著天秤上的事,我們不割,就是不割。
 
薛可正Facebook Page
http://www.facebook.com/sithoching
IG:sithochi

Read More
2019年11月08日

男人的Fantasy (二五九)瞞的時代

2019_11_08_Sit Menclub
網上資料圖片
 
打開網絡平台,每日都會見到好多朋友放生活照,呢個去越南旅行,嗰個去日本快閃,不過每一次都放單人相,仲要係自拍一種。
 
但明明佢就有男朋友,明明佢就係關係穩定,極好感情,唔知點解呢個男人就係消失喺呢個女人嘅網上生活圈中。呢啲本來唔係太關自己事嘅足跡,往往就係最令人好奇嘅事,慢慢你總會有幾個心水,經常都會留意住佢哋一舉一行,然後又喺一啲似是而非嘅証據入面,搖搖頭咁自己講一句:
 
「唉,又扮一個人。」
 
點解會咁?明明上次同佢食飯,我覺得佢男朋友仲好好,唔通佢哋就嚟分手?不過你唔會夠膽問人呢啲私人問題,因為的的確確係關我哋X事的。然後終於喺有一次,喺一場不名嘅酒局入面,我終於向一位on List嘅朋友,藉住幾杯紅酒嘅威力,冒犯咁向佢問一句:
 
「點解妳去親邊都唔影妳男朋友?」
 
去到呢一刻,我坦白咁講,好奇只係佔一半,而另一半,係我曾經都有諗過追呢個女仔,我好想知道,做佢男朋友,到底點解要收得咁埋。
 
我望住佢,佢又望住我,好在……
 
好在佢都飲醉。
 
「未揀定…一陣分咗手又煩。」
 
「吓,上次妳哋話就結婚喎。」
 
「就結婚都可以未揀定。」
 
聽到佢講呢句,我唯有草草咁拍吓手掌,講句「屈機」就行開。佢呢一句令我對佢嘅幻想消滅咗,亦差少少令我對愛情嘅展望都唔見哂。
 
我哋太多選擇,喺呢個世代,每一樣嘢我哋都伸手可及。唔識嘅可以上網Google,唔擁有嘅我哋可以搵Webshop去買,既然咁多選擇,我哋點解要花心思去做一啲關於耐心嘅事?
 
無咗耐心,感情就變得脆弱,隨時都可以搵到其他嘢取代,又點解顯得珍貴?
 
所以,「瞞」變得合理,變成愛情中嘅一個過程,每個人都覺得感情唔穩定,因為大家都有選擇,最後感情變成無選擇,死路一條。
 
最後我都發現,中意「瞞」嘅人都唔會得到自己想要嘅嘢,因為佢根本諗唔清楚,自己想要乜嘢。佢只係知道自己暫時唔想要乜,唔會知道有乜嘢係佢真正想要。
 
我都幾懷念以前嘅感情,無咁多空間,無咁多選擇,換返嚟嘅,就自然係專心,專心咁對待一段感情。
 
薛可正Facebook Page
http://www.facebook.com/sithoching
IG:sithochi

Read More
2019年11月01日

男人的Fantasy (二五八)台灣獨遊

2019_11_01_ Sit menclub
 
星期初因為一年半工半私嘅事,要出發到台灣幾日,無去台灣已經有好幾年,坦白講都有少少期待。
 
每一次去台灣我都做三件事,西門町、士林夜市仲有釣蝦。
 
好多人一聽到我講要做呢三件事,都要俾好多意見我,邊個夜市好食,邊個地方好玩。但就算我有幾多新事物要試,我都一定會優先去呢三個地方。
 
好幾年前,人生都叫遇過一次巨變。一個人拎住行李,漫無目的咁去到台灣,美其名扮療傷,其實只無毫無概念咁放空。人生去到一個階段,你以為擁有嘅其實並唔存在,路難行,放空可能都係一個好方法。
 
當時我只有一次去台灣經驗,而且第一次仲要同個仔仲有細佬去,帶住兩個細路仔,加上個仔又水肚不服而且台灣仲要落雨,我第一次嘅台灣之旅其實無咩玩,每日就係去西門町同佢地行啲旺角都有嘅玩具,夜晚去士林食啲又熱氣又無益嘅街邊嘢。
 
但我覺得開心。
 
就係咁,療傷之旅我又係去呢幾個地方,直到今次再去台灣,我都係去呢幾個地方。遊歷有回憶嘅地方係最好,世界上有一個場景,令你一去到就感受到快樂,何樂而不為?就算佢千篇一律,永不新鮮,但呢份開心正正就係我哋要去玩嘅原因。
 
就係咁,我一個人由西門町起步,再行去華山1914,跟住再踩單車去士林。一個人嘅遊樂就係雙面刃,非常悶但又非常自由,我唔使等任何人,我唔使理任何人想食乜,去到邊就停低食嘢,出發後想再食,就踩返轉頭都可以。
 
不過今次去台灣有突破點,因為以前去釣蝦,我都只係負責釣,天生對蝦蟹敏感嘅我從來都唔食大頭蝦,今次去台灣,我因為無時間去釣蝦場,一直都有多少耿耿於懷,去到士林時見到有一個路販賣燒海鮮,我望住好大隻嘅大頭蝦,唔知邊度嚟嘅勇氣,突然問老闆幾多錢:
 
「這些怎麼賣?」
「三百塊半斤。」
 
「………嗯……」
 
「給我半斤謝謝。」
 
嗰一刻突然有把聲叫自己「試吓新嘢,又唔使死」,我就點咗半斤,然後坐喺後巷準備開餐。最後我將所有蝦食晒,仲影咗張相同媽咪分享。
 
「你食得咩?」媽咪問
「想試吓。」
「好。」
 
試完之後,我覺得自己好叻,叻過寫書,叻過做導演。我影咗一張未食前同食完後嘅相,不停發俾我嘅身邊人,除咗另佢哋驚訝,仲想佢地讚吓我好叻。
 
我一路影相,一路打字,隔離班香港客人聽到我語音,就不停望住我,心入面可能諗,食幾隻蝦有幾叻呀肥仔?
 
今次台灣之旅最大收穫,值得寫低。
 
薛可正Facebook Page
http://www.facebook.com/sithoching
IG:sithochi

Read More