行到邊滾到邊隨身熱水杯

文：MenClub 魏文青　　
POSTED ON 29 Jun 2017

雖然我唔理解，但我知道呢個世界有啲人係無論天氣凍定熱，佢都一定要飲熱嘢，如果係滾嘅更加好添。如果你都係呢啲人，咁以下呢個木樽就啱你用啦，因為佢有加熱功能，令你「去到邊滾到邊」！

呢個名為「Cauldryn」嘅產品有兩部份，第一就係「Cauldryn」，一個十六安士(約450毫升)嘅不鏽鋼真空有蓋水樽；第二就係「Fyre」，一個電力驅動、內置電池，可以將「Cauldryn」入面嘅加熱至攝氏100度嘅加熱器。用法就係將「Cauldryn」裝上「Fyre」再撳個掣加熱。內置電池足以煲滾32安士液體，亦可以透過USB插濕電或者「尿袋」供電。另外亦有「Hot」、「Extra Hot」、「Brew」同「Boil」四種熱力，方便唔同需要。

其實「Cauldryn」最主要嘅目標顧客係野外生活、探險嘅愛好者，一方面可以提供熱飲，煲滾水亦可以為溪水等消毒，但如果你係一個鍾意熱嘢嘅城市人，呢個樽都可以幫你行到邊滾到邊嘅。