BUZZFEED推出智能煮食爐「Tasty One」

文：MenClub 魏文青　　
POSTED ON 06 Aug 2017

雖然外國網站BUZZFEED成日被人話係內容農場，佢佢哋某啲原創內容都真係幾吸引。例如佢哋喺Facebook放出黎煮食片，香港時間夜媽媽睇到佢煎牛扒、煮意粉、整芝士真係睇到濕哂——個咀角。而佢哋嘅最新搞作，就係一可以幫你煮出以上種種料理嘅智能煮食爐！

呢個爐叫做「Tasty One Top」，係一個有藍芽功能嘅電磁爐。佢嘅最大特色係可以連結同樣由BUZZFEED推出嘅「Tasty APP」，只要你揀好想煮咩餸，Tasty One Top就會自動調節到去啱嘅火力、時間，等你唔使再慢慢度溫度、計時，如果你想知道準確溫度，佢跟黎仲有一支可以插入肉類或者液體中嘅溫度計，確保你一定用緊適合嘅溫度煮嘢食。

BUZZFEED話呢個智能爐無論煎、炒、煮、炸、燒甚至慢煮都可以做到，就算你冇個APP或者冇電話喺手，都可以正常地使用；五角形設計加黑藍兩色又可以影相放上Instagram呃Like，成件事睇落又真係幾美好。目前預定仲有85折，只需149美金，即係1160HKD左右。你又會唔會心動？