HTC宣佈，8月22日凌晨0時起，VIVE售價將會下調200美元至599美元；香港方面亦隨之宣佈，售價會同一時間減$1,800港元至$6,399港元。無獨有偶，今年初另一VR裝備生產商Oculus亦曾經劈價200美元，外界普遍相信HTC此舉係回應對手，展開減價戰。無論如何，鷸蚌相爭，得利嘅始終係消費者，平啲咪幾好。

HTC VIVE美國區總經理Daniel O’ Brien亦否認，減價係為咗清舊貨，以便推出第二代新機云云，強調HTC VIVE喺未來都依然會繼續留喺市場直到2018，用家亦都可以透過多種外置配件去升級裝置，唔使下下換新機咁話。

依家買VIVE亦繼續可享免費試用Viveport訂閱服務，任揀五組VR內容或遊戲。現時Viveport上提供250多套VR應用內容，而其他平台如Steam等亦有合作建立相關內容，總數超過3,600種；HTC方面亦預告2017年下半年會推出《Fallout 4 VR》、《DOOM VFR》等大作吸引玩家。又有新Game，又減完價，係咪就係入手嘅好時機？

HTC VIVE官網按此