Moto X系列對上一款手機，已經要數到2015年嘅Moto X Force，等足兩年終於有新成員。今回採用5.2吋FHD IPS屏幕，機背鏡面加弧邊設計，機身仲支援IP68防水。

成部機最「突出」嘅一定係機背雙鏡頭，外型突出內涵都唔差，分別配備一枚12MP F/2.0 Dual Autofocus Pixel及8MP120°超廣角鏡頭，可以影相後再對焦製造景深，亦可以更改畫面局部顏色至黑白、彩色，轉埋背景都得，甚至可拍攝4K影片。另外相機亦有全新Landmark Detection景點偵測功能，將鏡頭對準一個物件，手機就會自動提供更多資料，去旅行搵資料最啱。前鏡頭都配備超班嘅16MP鏡頭，仲有全景同低光模式，燈光太暗都唔怕影唔到。

其餘規格方面就維持中階機水平，搭載Qualcomm Snapdragon 630處理器，內置3GB RAM、32GB ROM、3,000mAh不可拆式電池，支援指紋解鎖同USB Type-C，但就冇雙卡。新機9月起率先在歐洲上市，其後陸續在全球發售，定價€399（約3,720港元），備黑藍兩色。