今日下晝3點突然全城工作力大減，都係趕住去生果舖搶iPhone X。有人覺得今年似乎大貨殺到好易搶，更有傳聞話Apple為咗加快出貨，將Face ID準繩度降低。Apple方面急急出聲明，話子虛烏有，純屬捏造。

外國傳媒Bloomberg報道，指有消息人士透露，Apple曾指示生產商可以降低人臉辨識技術Face ID嘅準確度，以便加速手機出貨。Face ID係靠TrueDepth鏡頭系統，投射30,000個隱形測繪點繪製用家臉部圖像，並用紅外線鏡頭讀取圖像去比對圖像。較早前已經有報道指，投射隱形測繪點嘅組件生產出現短缺，因為組件極易碎，組裝時亦需要極度精準。消息未有提到，Apple放寬鏡頭規格到咩程度。

Apple發表聲明，指報道完全虛構，話好期待顧客11月3日起收到iPhone X，而Face ID嘅質素同準繩度冇改變過，係一個安全強大嘅認證系統，仍然只有百萬份之一機會有人破解到。當然冇人希望Apple為咗趕出貨而降低QC啦，不過唔少分析師仍然認為iPhone X出貨量遠遠低過預期，KGI分析師估計首日出貨量由4,000萬減到2,500萬至3,000萬，希望搶到iPhone X嘅朋友唔會被咳單啦。

來源：Bloomberg