呢排大家可能好關心iPhone X幾時出貨，甚至回收價幾多；但真用家當然更關心佢嘅性能。主打功能Face ID似乎固若金湯，用30,000點紅外線3D掃描，撞中機會率只得100萬分之一；但孖仔孖女呢？有片有真相。

Apple尋日向部分傳媒率先發放iPhone X真機試玩；外國傳媒Mashable搵咗兩對同卵雙生嘅孖仔返嚟拍片實測，嘗試互相利用Face ID，撞入對方嘅iPhone X。結果……係成功嘅。不論孖仔A有冇戴住眼鏡，都一樣可以畀孖仔B一秒解鎖，輕易睇晒手機入面嘅Facebook呀相呀情慾短訊呀咁。即使對調由孖仔B撞入孖仔A嘅Face ID，都一樣無難度，一Take Pass。

咁孖女呢？識玩緊係搵俄妹玩。雖然呢對孖妹呢……就走復古風，以為係《壹號皇庭》行出嚟咁；但造型係唔影響Face ID實測結果嘅（聽唔明俄文唔緊要，睇片都估到大概做緊乜）！孖妹A設定完Face ID後，孖妹B都係順利無阻就解到鎖。留意返，Face ID目前只可以設定一塊臉，唔似得Touch ID咁可以Set幾指手指解鎖。

孖妹亦試過合埋雙眼，用Face ID係解唔到鎖嘅；但睜開眼果一瞬間，就立刻會解鎖，所以都的確有機會遭人暗算架！各位巴打睇路啦！

來源：Mashable, Чудо техники