太空人的陀飛輪

文：MenClub Patrick　　圖：互聯網
POSTED ON 12 Nov 2014

睇完《星際啓示錄》，唔止知道太空環境幾咁惡劣，更明白到時間幾咁重要，一分一秒都唔嘥得，所以太空人無時無刻都要check住時間。好可能真係為咗令太空人有錶戴，於是MB&F就設計出呢隻Horological Machine No.6（HM6）Space Pirate，聲稱確實能夠喺外太空之中正常運作。不過計我話，隻錶型成咁，唔上太空都啱戴啦！

單係佢錶身嗰4個圓球體（再加1個半圓球體），已經cyber味盡顯。點睇時間？就算靠下方兩個球體，左邊嗰個顯示小時，右邊嗰個顯示分鐘；而上方兩個球體入面嘅渦輪，就能夠透過錶身擺動嚟自動上鏈。但最勁仲要數中間嗰個半球體，其實入面係一個60秒嘅陀飛輪，有咗佢，隻錶就能夠確保行得精準，呢樣最緊要！要喺太空戴，用嚟製造HM6嘅物料梗係非同小可。佢外殼就用上真正航空級嘅Ti-6Al-4V鈦合金製造，而所有見到零件嘅地方，都係用藍寶石水晶玻璃覆蓋，特別襟撞同耐刮。陀飛輪上面仲有個可開合嘅防護罩，用嚟抵擋紫外線入面嘅輻射，避免陀飛輪被破壞，有失準確性。成隻錶似足科幻電影入面啲高科技裝置，唔講堅唔知係錶嚟。