摺得孭得　電動單車可縮骨

文：MenClub Patrick　　圖：互聯網
POSTED ON 20 Nov 2014

唔使問喇，有「電動」兩個字，就肯定呢架縮骨單車唔可以喺香港踩，但最sad嘅係，架車係一間北京公司設計嘅，唔通香港仲落後過大陸，連想玩吓電動車都唔得？好，呻完，睇番架車點摺得孭得先。設計佢間公司叫「Impossible Technology」，亦都將佢改名叫「Impossible」，預計出年8月推出，大約賣US$377（約$2,933）。

佢最Impossible係成架車嘅重量唔夠5kg，差唔多只係兩部大芒notebook咁重，仲要啲支架偷盡所有位嚟摺，摺到最終極形態，大約只有一隻前臂咁長，真係放得落背囊，孭住四圍走。摺到咁款，會唔會好化學，負重力唔夠？原來佢都承受得到85kg嘅重量，正常體型嘅男士都踩得。最高時速就有25km，若然「收油」少少行20km嘅話，佢藏喺車輪入面嗰10粒2,900mAh電池，每叉個半鐘頭電，就夠行45分鐘，朝早踩完佢返工返學，喺office或學校叉電，就可以夜晚再踩佢返屋企，都夠用嘅。冇地方叉電嘅話，咪孭住佢走人囉，唔踩嗰陣收埋喺背囊，更加唔怕俾人偷添。