睇我冧唔冧　先畀你走近

文：MenClub Patrick　　圖：互聯網
POSTED ON 07 Jan 2015

「行近～我又怕驚動你～」冇錯，呢套成件聖衣咁款嘅Spider Dress 2.0，設計目的就係唔畀人立亂行近，悍衛你嘅個人空間。

佢係荷蘭電子服飾設計師Anouk Wipprecht嘅最新作品，裙身係用3D打印技術製成，兩邊肩膊位有6隻好似蜘蛛腳嘅活動機械臂，所以定名為Spider Dress。裙入面內置咗電腦晶片及唔同感應器，識根據兩樣嘢嚟判斷着住條裙嗰個人，想唔想畀其他人走近，一係自己嘅呼吸頻率，二係人哋走近嘅速度。若然啲sensor偵測到你呼吸加速，或者有人快速走近，就會視你係唔想畀對方接近，嗰6隻蜘蛛腳就會大力咁拮，意圖嚇走來者；如果對方係慢慢咁行近，Spider Dress 2.0又feel唔到你呼吸加速嘅話，嗰6隻腳只會好溫柔咁慢慢郁，好似同對方打招呼咁樣，歡迎佢走近。暫時Anouk Wipprecht都未定出Spider Dress 2.0有咩實際用途，不過睇落用呢套技術嚟防狼都應該work喎！

有2.0當然有1.0，上代Spider Dress是咁的，2.0有美感好多。