CES 2015　最值得男士關注的10件新科技產品

文：MenClub Patrick　　圖：互聯網
POSTED ON 09 Jan 2015


過埋今晚（1月9日），每年第一件科技界盛事－－喺美國拉斯維加斯舉行嘅國際消費電子展（CES）就會閉幕，基本上場內展出嘅所有新產品、新技術，都已經曝晒光，係時候一次過為Gentleman晒冷報道一下。不過，MenClub當然唔會講咩咩notebook用邊款新CPU呢啲咁悶、或者邊間廠出咩新手機呢啲咁老正嘅嘢。今年筆者就嚴選咗10樣最值得男士關注嘅新產品（或技術）出嚟，再由第10位數番上第1位，立即為各位報榜！
第10位　自動駕駛Benz 未開show前，所有評論都話今屆CES嘅焦點會係智能汽車，開正男士嗰瓣，而呢方面最搶鏡嘅，就要數Mercedes-Benz喺會上發表嘅未來概念車「F 015」。事關佢唔止係一架車，更加係一間移動房間，前座兩個位能夠反轉面對後座兩個位，再交由架車自己作無人駕駛，咁樣車主同親友同事就可以一邊坐車一邊面對面傾偈，幾疏乎，只係唔知幾時先正式量產啫。
第9位　真正個人車箱音響一不離二，繼續講吓汽車科技。有冇試過揸車載住一家大細嗰陣，你想用喇叭或藍牙耳機靜靜傾電話，但係啲細路或老婆要聽歌嘈住你？或者你女友想聽K-pop，你想聽發燒天碟，但又唔敢逆佢意？汽車音響廠商Harman喺CES展出呢套叫做ISZ（Individual Sound Zones）嘅系統，就係用嚟解決呢啲問題，締造和諧車箱空間。其實佢嘅原理就係喺車箱多個位置內置喇叭，再透過特殊定向技術，令每個乘客都只聽到屬於佢個位嘅聲音，唔會嘈住隔籬，大家仲可以用同一套平板電腦系統嚟操控播咩歌，幾醒喎！
第8位　夾心口相機仔呢個叫做Narrative Clip 2嘅物體，睇落好似係MP3機或無線耳機嘅接收器，但其實係800萬像素嘅DC仔嚟，夾喺恤衫袋或Tee領口，就可以神不知鬼不覺咁影相同拍片，之後仲能夠經Wi-Fi無線傳去你部手機度添。點解男士要關注呢部嘢？梗唔係叫大家用嚟偷拍啦，相反，係等大家知道咗有呢件嘢後，從此要避嫌呀，好快正式賣㗎喇！
第7位　遙控電器萬能插近年Apple經常提到「HomeKit」概念，但實質係乜嘢，世人一直唔係好知。今年CES終於有產品令大家明白到底係點，就係呢件萬能插咁款嘅iDevices Switch，只要將佢加插喺對應嘅電器插蘇上面，嗰件電器就能夠透過iOS app嚟遙控開關機同運作。據官方講，唔止可以用嚟開燈開冷氣之類，連遙控咖啡機沖咖啡都得，啱晒屋企冇女人幫你做呢啲嘢嘅毒男（除咗老母）。
第6位　自動鬆開智能腰帶法國創新公司Emiota，就喺CES展出呢條智能腰帶Belty。有乜咁智能？原來係識根據你嘅飲食狀況同活動量，自動用腰帶上嘅摩打嚟調校鬆緊，Gentleman大擦一餐之後，就算個肚勁漲，都唔使自己鬆褲頭帶咁失禮。不過，佢點樣判斷你個肚係咪漲到要鬆一鬆，仍然幾令人質疑，暫時得個知字先。
第5位　65吋任捽大tablet 男人，有時真係幾鍾意「大」嘅，所以要關注吓呢部美國廠商Fuhu展出嘅全球最大Android tablet Nabi！佢最細嘅尺寸都有成32吋，最大更加去到65吋，仲大過一般電視機，但定價都唔算太貴，係US$4,000（約$31,120）。生產商嘅原意係設計畀小朋友用，但心邪的我覺得男士用都好唔錯，尤其係用咁大個芒嚟上網睇J圖，仲可以不停捽捽捽，捽到1:1咁大，諗起就興奮！！！
第4位　新Beyond 4K TV 同Nabi差唔多道理入選嘅產品，不過呢件唔止「大」，仲要「清」！4K都未完全普及，但Sharp已經喺CES入面展出呢部80吋、叫做「Beyond 4K」嘅電視機，畫面像素高達6,600萬，比4K TV嘅2,400萬仲要多出4,200萬，夠晒誇張！男士點用好？用嚟睇愛情動作片，真係清到逐條毛、逐粒水珠都數到喎！Beyond 4K級數嘅AV，而家冇啫，將來實會有㗎，FF定先啦！
第3位　微型電腦金手指睇到呢度，各位應該都知我揀選呢10大產品嘅其中一個準則，冇錯，呢隻Intel出嘅Computer Stick亦都係因為咁入選。佢只係大過普通USB手指少少，但內置咗四核心Atom CPU，仲行到Windows 8.1，直頭係一部微型電腦嚟，仲支援埋Wi-Fi上網功能，將佢插落電視機度，真係睇乜玩乜甜嘢都得，喺電視機前面仲好難發現佢嘅存在添。擁有佢，可能仲好過擁有加藤鷹嘅金手指呀！很想要吧？3月就會出，定價係US$149（約$1,136）。
第2位　巨型隔音安全帽嚟到亞軍位置，筆者誠意將呢頂巨型安全帽Selentium's Comfort-Shell，推介畀正忍受住家中女人日哦夜哦苦難嘅男士。事關佢其實係一個新科技隔音罩嚟，透過特殊技術，你只要擺個頭喺入面，唔需要密封佢，都能夠隔絕外間聲音。從此唔使苦練左耳入右耳出神技，或者問聾耳陳借耳仔，都可以擺脫老婆、女友、老母、外母、阿嫲、阿婆、姨媽、姑姐嘅唐三藏式煩音折磨。
第1位　引人中伏智能床榜首之位，當然係留畀關乎生死嘅產品！呢張叫做Sleep Number嘅智能床，本來只係設計畀小朋友瞓，識根據佢哋瞓覺時轉身等動作，調校床褥角度，令小朋友瞓得更舒服，功能好正常。之不過，佢大鑊在仲有監控睡眠狀況功能，無論呼吸、動作、睡眠時間，甚至心跳都會記錄低，再send去手機app畀人睇。萬一老婆女友們有心check各位男士，貼呢張大床畀你瞓，而你又唔知佢嘅橋妙，照瞓兼照偷食，咁就一定中伏die hard喇！大佬，就算俾你講得通點解會無端端喺床上激烈郁動同心跳狂加速，都吟唔甩點解床上會有兩個人呼吸喎，你話係咪唔關注唔得喇！