打車輪前吹一吹　唔會激嬲你條女

文：MenClub Patrick　　圖：互聯網
POSTED ON 12 Jan 2015

標題講到咁白，我諗好多Gentleman都估到呢嚿綠色物體有咩用，咁我都唔賣關子了，直接介紹佢吧。

呢嚿嘢叫做Mint，定位係口腔健康探測器，只要含佢入口吹幾秒，佢就知你口腔狀況良唔良好，再透過app話你知。咩原理咁神奇？佢主要係靠偵測你呼出空間入面嘅水分同硫化氫（H2S）含量嚟判斷，含量低就顯示你口腔狀況麻麻，提醒你係時候去刷牙，或者至少食嚿香口膠、飲杯水。點解要監察水分，可能大家都明，咁H2S係乜嚟？原來係口腔入面必有嘅一種無機化合物，低濃度嗰陣就會產生臭味，正正係口氣嘅來源。所以你話刷牙使鬼佢提？其實偵測你個口臭唔臭，先至係Mint嘅最大功能嚟㗎！打車輪前check一check，自信心返晒嚟，車輪都打得放心啲！ Mint係由一間華人創立嘅公司Breathometer開發出嚟，現時仲喺Indiegogo平台上面集緊資（呢家嘢唔只得Kickstarter㗎），預計今年8月正式推出，將會賣US$99（約$770）。即係佢而家仲未有得賣㗎，唔使咁快問去邊度買喇，就算情人節趕住用都幫你唔到呀！