呢條正喺Kickstarter集資、叫做「Glow」嘅earphone，線身係用透明而柔軟嘅聚碳酸酯製造，所以能好似螢光棒咁透出燈光（有藍、紅、綠三色揀），定價US$149（約$1,160），預計7月正式推出。

佢仲學埋近年新興嘅運動耳機，喺耳塞入面內置埋心跳感應器，除咗可幫人連接手機app check心率，仲識得跟住心跳速度嚟調校線身燈光嘅亮度，時光時暗，睇落就好似條線跟住心跳閃咁樣。

型就幾型喇，但隨咗戴住佢出街引到人望之外，仲有咩實際用途呢？Well，其實都可以話同螢光夜一樣，夜晚跑步嗰陣，啲車唔會因為睇你唔到而撞到你囉。不過，奉勸各位男士喺公司或屋企偷睇甜片嗰陣唔好戴佢聽聲，無謂俾人發現你無啦啦心跳加速啦！（其實佢仲可以選擇跟聽緊嘅歌曲節奏嚟閃嘅，有需要時咪咁樣解釋囉。）