依家香港嘅住宅寬頻，網速閒閒地都1000M，月費最平去到百鬆啲就有交易，真係又平又好用。不過如果係村屋、舊唐樓等住宅，基於基建問題(冇光纖)到今時今日都只可以用8M8M寬頻，上網睇AV…I mean睇Youtube都唔可以開到最高清呀陰公！

而由Space X推出嘅Starlink寬頻，就係以人造衛星代替光纖，為偏遠地區人士提供高速上網。自上年5月首批衛星升空之後，今年7月正式於美國進行Beta Test，近日更有人將相關數據放上Reddit討論區，速度、延遲方面似乎都幾可靠喎！

Here is a summary of the recently found Starlink speed tests from r/Starlink

據Reddit用家提供嘅數據，Starlink嘅下載速度最低為11Mbps，最高為超過60Mbps，而上載速度就係5Mbps到18Mbps。用慣1000M寬頻嘅你當然覺得冇乜嘢，但你需知道香港村屋嘅所謂「8M寬頻」，實際上下載速度都係幾百k，美國一啲偏遠地區更加只有1M、甚至直頭冇寬頻，所以下載速度有十幾以至幾十Mb，對我哋黎講已經係超高速。

唯一比較遜色嘅就係延遲方面，大約為31ms到94ms，普通上網冇咩大問題，但如果用黎打機就應該會發炆憎。但亦另外嘅Reddit用家試過低至20ms延遲，似乎係因為Starlink服務尚未穩定嘅原因。

值得一提嘅係，2016年美國聯邦通信委員會批准Space X送12000個Starlink衛星上去，但到目前為止SpaceX只係送咗大約600個衛星去近地軌道，亦即係話Starlink仲有極大潛力。同時亦需要留意，參加咗目前Starlink Beta Test嘅用家，因為簽咗保密協議嘅關係，理論上係唔能夠公開使用數據，所以目前公開嘅數據未必能夠代表Starlink嘅真正表現。但如果佢真係有呢個速度，月費又只係80美金黎講，相信唔少人都會有興趣轉用。