Apple新飛碟總部　興建近況曝光

文：MenClub Patrick　　圖：互聯網
POSTED ON 20 Feb 2015

係果粉都應該聽過，Apple為實現Steve Jobs的夢想，現正在加洲興建新總部Apple Campus 2。自從上年Apple Campus 2的設計圖被公開後，由於它似足巨型飛碟的外形實在太震憾，引到不少人時時留意住其興建進度，更加拍片公諸於世。就好似近日，又有人用航拍無人機拍攝了Apple Campus 2的最新狀況，可以睇到它已具雛型，相信能夠如期在2016年年尾落成，起樓快過開發iTV等傳了N年都冇影的新產品喎！

Apple Campus 2佔地70公傾兼樓高4層，外牆係360度落地玻璃，將會大量採用自然光及自然風去取代燈光及冷氣，再加上玻璃外還裝上太陽能電池板，去供應總部內電器的電力，環形大樓內外又種滿樹木，所以被譽為全球最環保的建築物之一。但據講大樓內的設施，會跟大樓外形一樣充滿未來感覺，Apple喎，梗係信會係真啦！最近Steve Jobs的愛將、Apple設計部門資深副總裁Jonathan Ive再透露，建築團隊係先製造4,400塊水泥板，才運到地盤拼合成大樓，所以話他們是在「組裝」總部，而非「建築」總部，一個產品設計師，竟然連公司起總部都跟得咁緊。另外，Apple Campus 2建築師Norman Foster亦講過，就連Steve Jobs生前都有親自參與過設計，成件事真係貫徹Apple注重細節、親力親為的作風，若然打後每代iPhone都keep到係咁就好喇！