大家仲記得早排瘋傳一段謠言，話iOS同Android手機都「偷偷」加入「Covid-19」追蹤器，追蹤大家嘅位置嗎？好在最後由「Factcheck Lab」澄清你先唔使花心機同阿媽解釋咩係API。其實Apple及Google早於4月就聯合公佈會推出相關功能，以方便衛生當局及手機用戶知道自己有冇接觸過確診者。而Apple及Google最新推出第二階段，方便衛生當局使用呢個「接觸通知/暴露記錄(ENS)」功能。

卻說早前嘅更新其實只係開咗個API，而要將API變成實際用得嘅嘢，衛生當局係需要整個APP出黎，問題係依家美國48個州得25個有研究過點整個APP，目前更只得6個州真係出到一個「接觸通知/暴露記錄」APP，所以為咗方便當局使用該功能追蹤疫情，Apple 及Google就推出新功能免去「整APP」呢個步驟。實際運作就係衛生當居提供一系列如確診指引之類嘅資料，Android就會自動Gen個APP出黎，而Apple就更加係將功能融入作業系統之中 (亦即係最新推出嘅iOS 13.7)。

截圖

ENS嘅原理，係啟動後手機會自動生成一組每十至廿分鐘轉一次嘅識別碼，而手機之間就以藍芽去認附近出現過嘅識別碼 ，然後萬一有ENS使用者確診，而佢又肯將向ENS通報，咁其他ENS用家就可以用APP去核對，自己部電話有冇紀錄過確診者過去一段時間有用過嘅識別碼，從而知道自己有冇接觸過確診者。當中唔會紀錄手機嘅GPS位置，系列亦唔會主動知道邊個確診、邊個有接觸過確診者。