唔知大家平時做嘢會唔會要用到Excel，假如有呢個經驗，大家都知對住一個超多Data、Load得又勁慢嘅Excel係一件幾咁令人頭痛嘅事。但再頭痛你都唔會夠英國防疫當局頭痛，事關佢哋唔單止要對住嘅唔單止係極龐大嘅Excel，仲係一個出錯嘅Excel，令到當局計少咗近16,000個確診個案。

據《DailyMail》等多間英國傳媒報導，英國當局昨日公佈嘅新確診數字超過22,000個，比起週六嘅約12,800個跳升近一倍，亦創下英國單人新確診數字紀錄。但數字急升嘅原因就唔係有大規模爆發，而係因為當局發現用黎紀錄確診資料個Excel，喺9月25日就已經到達紀錄上限，換言之由當日去到發現問題嘅10月2日，大約一個星期之間，有15,841個確診個案根本就冇加入個Excel到，亦即係漏報咗。所以當漏報嘅個案慢慢加返上去，就創下英國單日確診紀錄。

英國公共衛生部指，雖然數字上有出錯，但每位確診者都知道自己係確歲，當局亦有指示佢哋要自己隔離。而所有漏報個案亦已經於10月3日凌晨轉介到英國嘅接觸者追查系統。