LG曾喺手機市場風靡一時，同三星鬥得叮噹馬頭，近年逐漸被三星超越。據韓媒《韓國先驅報》報導，LG過去五年累計虧損約5兆韓元（約351億港幣），正考慮退出智能手機市場。

據韓媒消息，LG行政總裁權邦錫（Kwon Bong-seok）星期三向員工發出內部信件，暗示未來將考慮針對LG手機業務進行調整，但唔係要炒大家魷魚叫各位員工可以放心。另一位LG代表向《韓國先驅報》表示，面對全球手機市場競爭日趨激烈，LG係時候要理智評估作出最佳選擇，公司正考慮各種可行措施，包括出售、退出或縮減業務。

LG Velvet （圖片截至：lg.com）

LG wing（圖片截至：lg.com）

LG Rollable（圖片截至：Youtube）

其實LG近年喺手機開發上絕不馬虎，可以睇到佢哋好積極嘗試更多創新設計。包括能夠透過配件擴充成雙螢幕嘅「LG Velvet」、配有旋轉螢幕嘅「LG Wing」、當然唔少得最近喺CES2021展示嘅捲軸式屏幕手機「LG Rollable」，創意設計雖然引嚟唔少討論，但實際銷售卻未如理想。