繼4月春季發布會後，Apple喺今日凌晨舉辦2021年開發者大會（WWDC21），可惜今次就冇傳咗好耐嘅新版Macbook Pro，不過就有一系列作業系統大更新，加入咗唔少實用新功能。

作為最多果粉使用嘅系統，Apple今次針對FacetTime推出Spatial Audio功能，為用戶提供環境音效及降嘈功能，視像通話嗰陣可以去除周遭嘅雜聲，人聲變得更加清晰。另外，FacetTime界面亦有改進，新增人像模式、Grid View、SharePlay功能，進行會議視像通話時，講緊嘢個位朋友會有個白色框標示出嚟，等大家知道邊個講緊嘢，而Share Play功能就可以分享依家聽緊嘅歌或睇緊嘅片畀對方。

今次亦加入咗「原況文字」（Live Text）功能，簡單嚟講就係可以將相片入面嘅文字掃描出嚟，等用戶可以複製到其他地方或者搜尋資料、打電話等等。

至於通知中心方面亦有重新設計，除咗啲App嘅Logo變得更大，系統亦會根據你平時使用習慣，將常用嘅App通知放喺最頂，等你唔使花時間一個個咁睇。

全新嘅天氣功能將會有更多資訊，包括氣壓、紫外線指數等等，並會加入大量動畫。iOS15同時亦改良咗Apple Map，今次加入斑馬線、紅綠燈等更多資訊，甚至有日夜、夜間模式。

喺今次iPadOS 15版本，可以見到Apple今次更新主要強化iPad生產力，話晒新iPad Pro都係用上M1晶片，效能同Macbook不相伯仲。iPadOS 15將會可以好似iPhone咁將Widget加入主畫面，同時提供App資料庫功能。

至於多工處理方面，用戶可以喺iPadOS 15用緊任何一款App嗰陣隨時返回主畫面，並打個第2個App，同時支持「分割顯示」。今次亦加入咗「快速備忘錄」功能，搭配Apple Pencil喺任何地方只要下拉就可開啟記事功能。

iPadOS 15嘅翻譯App可以透過語言或文字輸入，直接轉換成另一種語言。同時亦可以處理其他外部文字，只要係其他App叫出翻譯功能，就可以即時翻譯文章、網頁、圖片上嘅文字。

「通用控制」（Universal Control）功能，令用戶能夠用同一組滑鼠及鍵盤喺Mac及iPad之間無縫切換，甚至可以同時操控三台設備，而且可以將檔案喺各個裝置之間快速傳輸，例如將影片直接從iPad「拉」入iMac電腦嘅Final Cut程式編輯，唔使再透過AirDrop或其他方式進行額外檔案傳輸。

新macOS改善咗Safari畫面設計，將工具例、網址例、索引都放埋喺同一行顯示，等用房可以有更多空間瀏覽網頁。用戶更可以組織索引群組，自己分類出唔同題材，例如影視、新聞、電玩等等，更可以將索引群組透過Email方式分享畀朋友，同步到其他裝置。