自從Apple喺iPhone 7開始取消3.5mm耳機插孔，其他大廠就相繼取消旗艦機款耳機插孔，繼而將機身做得更輕薄同防塵防水，加上近年真藍芽耳機技術發展迅速，市面上貴價少少嘅無線耳機都唔會有太大延遲以及續航力問題，唯獨音質同有線耳機仲有一大段距離。唔少人為求方便，又或者冇得揀（冇窿插），都會選擇轉用無線耳機，令有線耳機逐漸淪為發燒友玩意。最近外國站Phone Arena做咗項調查，問網友覺得2021年嘅智能手機仲需唔需要耳機孔，結果顯示近8成人都認為有好過冇，唔知大家又點睇呢？

喺呢個無線耳機橫行嘅年代，仍然有近8成人（77.17%）希望手機可以保留耳機孔，就算唔會用都認為有總好過冇。而認為唔需要有耳機孔嘅人就佔14%；認為冇所謂嘅人佔5.61%；亦有3.2%人覺得反正用轉接器就搞掂。唔知各位又用緊咩方法聽歌呢？追求音質嘅朋友用緊轉接器，定索性買咗部DAP出街聽歌？