日常生活少不免會用到八達通、信用卡、電子匙卡等非接觸式工具，最近俄羅斯有位醫生就覺得搵卡嗰陣好嘥時間，索性將5種唔同嘅晶片植入手掌，每日出街只要揮一揮手就能夠暢行無阻。

（圖片截自：RT）

呢位嚟自俄羅斯新西伯利亞嘅醫生Alexander Volchek，總共植入咗5枚晶片，三枚喺左手手腕、一枚喺右手中指，最後一枚係右手手腕。無論開電子門鎖、用ATM撳錢定係搭車畀錢，只要舉起隻手「嘟」一下就搞掂。

呢類採用無線射頻辨識（RFID）技術嘅晶片可以做到好似粒米咁迷你，細嘅尺寸為1.5x7mm，大嘅都只係2x12mm，亦唔係咩新穎科技，八達通、寵物植入嘅晶片就係用緊類似技術。之不過因為宗教理由、健康隱憂、資料外洩風險等各種原因，而未被大眾廣泛植入體內使用，所以Alexander Volchek咁高調分享喜悅，好快就吸引到當地媒體採訪，佢仲喺記者面前洋洋得意咁示範開門添！