小米近年積極擴充產業，從一開始只係整電話，變成又出家電、喇叭、智能手錶嘅科技公司。尋日佢哋就喺秋季發布會推出一款令人意想不到嘅產品「仿生四足機械人CyberDog」，正式踏足機械人領域，不過唔少人就覺得隻CyberDog有啲似美國公司Boston Dynamics嘅機械狗Spot，大家又點睇？

根據小米介紹，呢部“自主研發”嘅機械人中文名叫做「鐵蛋」，能夠做出奔跑、踎低、站立、後空翻等多個高難度動作，甚至可以聽主人指令伸隻手（腳）出嚟同人握手。

至於硬件性能方面，CyberDog全身配備11個高精度Sensor，其中包括鏡頭、超音波感應器、觸摸感應器等等，能夠感知圖像、光線、距離、速度、聲音等多項環境信息，再透過「AI超級晶片」處理還原真實嘅生物反應，而且能夠以最快3.2m/s速度行走，最大負重量為3kg。

小米打算先限量推出1,000部「CyberDog 工程探索版」，以9,999人民幣價格賣畀米粉、工程師及機械人愛好者優先使用，藉此創造一個小米機械人開源社區，吸引更多發燒友一齊著手研發、探索未來。

同場加映Boston Dynamics 2016年推出嘅機械狗「Spot」。（圖片截自：The Verge）