大家等咗好耐嘅iPhone 13系列日前終於正式發布，相信唔少人都覺得冇咩驚喜，皆因早喺幾月前就有多方消息指新機除咗「M字額」窄咗、鏡頭擺位唔同咗之外，外觀都冇太變化。對此，Apple CEO Tim Cook日前就向全體員工發出一封內部郵件，表示會全力追查洩密者身份。有趣嘅係，其實呢封「郵件」都係內部消息嚟，呢頭講完就被人洩露咗出去。

根據外媒The Verge報導，事源於Apple喺17日舉行咗一場員工大會，當中提到公司要求員工更頻繁進行核酸檢測，不過就唔強制要求接種疫苗。另外又提到Apple同Epic訴訟案結束後，希望公司能夠向前邁進。以上兩則消息本來係內部機密，但被人洩露咗出去，令到部份員工感到沮喪同不滿，所以Tim Cook喺噚日（22日）就向Apple全體員工發送一封內部郵件。

Tim Cook喺信中坦言，17日個場會議大部份細節都被洩露，自己同大家一樣咁沮喪，向員工承諾會竭盡全力查出洩密者身份，並強調洩密者「唔屬於呢度」，暗示一旦發現員工洩密，就會即刻炒魷魚。

早喺今年6月就流出過iPhone 13系列諜照。

事實上，早喺17日員工大會、甚至秋季發布會之前，Apple內部已經有好多「洩密者」向媒體爆料，否則大家都唔會事先知道咁多iPhone 13情報，只不過Tim Cook依家開到聲要正視呢個問題。