相信YouTube已成為唔少朋友每日必睇網站，無論時事、音樂、教學、娛樂冚唪唥都可以喺入面搵到，作為觀眾除咗可以畀Like或Dislike，亦可以留言表達個人意見促進社群互動。之但係YouTube聲稱為減少惡意負評，宣布由即日起陸續隱藏影片「Dislike」數字，各位依然可以撳「Dislike」，只不過除咗片主本人，其他用戶通通都睇唔到條片有幾多Dislike。

據官方所講，YouTube從今年3月起局部測試隱藏Dislike數字，期間發現知度較低或新晉創作者容易遭受網友「Dislike攻擊」，而且唔少網友畀Dislike純粹係針對創作者本身，並非同條片好唔好睇有關，為避免大家會濫用Dislike及幫助新人茁壯成長，所以決定全面隱藏「Dislike」數字。

事實上，其他平台都出現過類似做法，例如Instagram可以由創作者自行決定顯唔顯示貼文讚好數目，避免用戶因為貼文Like數太少，而產生嘅負面情緒及心理壓力。有趣嘅係，YouTube宣布要隱藏Dislike數嗰條片，就收到極多Dislike。