起初唔少人都以為係愚人節玩笑嘅Dyson空氣淨化降噪耳機「Zone」終於公布發售日期，大家有冇興趣先？

Dyson Zone經過長達6年時間研發，結合主動降噪及空氣淨化功能，2,600mAh電池提供50小時音樂播放，或4小時空氣淨化+音樂播放。耳機內建11個麥克風，可進行通話，並每秒監察周圍聲音384,000次，能阻擋高達38db環境噪音。而揚聲器嘅驅動器及電子裝置、機械系統、材料及聲學都經過精心設計，以將失真減至最低，完整呈現原有音樂。用家更可以透過手機程式「MyDyson」按喜好調整降噪模式、音量上限及EQ曲線。

至於空氣淨化功能方面，耳罩內嘅壓縮器通過雙層濾網吸入空氣，並沿住可拆卸面罩將淨化氣流送至用家嘅口同鼻，其中第一層靜電濾網能捕捉99%小至0.1微米嘅污染物，而第二層K-Carbon濾網則能夠捉城市常見嘅酸性有害氣體，例如二氧化氮及二氧化硫。

Dyson Zone將於2023年1月率先於中國開賣，3月起在美國、英國、香港及新加坡發售，目前未知香港定價如何，但以美國定價US$949嚟睇，香港售價應該大約HK$7,500。