早前一名17歲日本高中生於壽司郎分店嘅「口水惡作劇」，除咗令壽司郎股價大跌之外，仲吸引咗不少人模仿，其餘兩個日本連鎖迴轉壽司品牌「濱壽司」及「藏壽司」亦成為受害者。而為咗防止呢種「壽司恐襲」，挽回顧客對迴轉壽司嘅信心，藏壽司日前就宣佈會為分店加入AI鏡頭，以捕捉一切可疑行動。

據《日經亞洲》報導，藏壽司目前已經有於分店安裝監視系統，主要係用作監視壽司輸送帶上嘅壽司數量，以及協助埋單計數。而由三月起，藏壽司就會為全國分店嘅監測鏡頭加入行為偵測功能，如果偵測到「可疑行為」，就會主動提醒店員。

而壽司郎亦於事件後採取應急措施，當中最主要嘅就係暫停於輸送帶上放置壽司，全面改為平板電腦落單後店員送到上檯嘅服務方式。

值得一提嘅係，日本藏壽司似乎相當熱衷於用AI協助業務。2020年疫情期間，佢哋就曾經嘗試利用AI對原條吞拿魚進行分析，只要用手機拍下吞拿魚尾部嘅橫切面，就能對魚肉質素進行檢定，免卻吞拿魚買手需要親身到場、甚至飛到海外入貨嘅麻煩。

資料來源：日經亞洲