隨住海平面不斷上升，陸地居住空間逐漸減少，最近日本新創建築公司N-Ark就計畫興建一座能夠自給自足嘅漂浮城市「Dogen City」，最多可容納4萬人，並擁有全方位生活配套，衣食住行一應俱全。

據官方介紹，Dogen City採用圓環設計，直徑約1.58公里、周長4公里，能容納1萬名居民及招待3萬名遊客來訪，同時能抵禦各種地震、洪水及海嘯等自然災害，猶如現代版挪亞方舟。

城市主要由三個部份組成，分別係提供生活基礎設施及住屋嘅圓環，同能保護內灣免受海嘯侵襲，其次係置於水下嘅數據中心，透過海水自然冷卻節省能源消耗，最後就係內灣嘅漂浮建築群，包涵學校、公園、體育館、酒店、食品工廠、醫院、辦公室等設施，居民更可透過遠程醫療諮詢服務及血液樣本分析評估健康狀況。N-Ark並未透露項目成本及選址，但就預計首個Dogen City將於2030年投入使用。