NASA近日公佈由James-Webb太空望遠鏡 (JWST) 拍攝嘅太空高清照片，原意就想展示一組頗近太陽系嘅「赫比格-哈羅天體 (Herbig-Haro object或HH天體)」，但放大相片竟然發然，背景中嘅遙遠太空中，竟然出現一個完美嘅「？」，唔通係外星文明向地球發放嘅文字訊息？

卻說JWST早前拍下位於太陽系外約1470光年嘅「HH天體46/47」，亦即圖中心兩條橙紅色線嘅相交點，呢兩粒星體為相當年輕嘅恆星，僅形成數千年並不停對外噴射氣體，附近藍藍橙橙嘅就係佢哋產生嘅星雲。NASA指研究呢兩粒恆星會有助人類了解太陽當初係點形成嘅。

但撇除呢條「Hard Core科學」之外，有人就發現圖片嘅中間下方，竟然有一個頗為明亮、而且相當工整嘅橙色「？」。瞬間就令網民猜測是否外星文明留下嘅訊息。

個「？」位於圖中下方正中，大家又搵唔搵到？

對此，《National Geographic》就引述太空望遠鏡科學研究所嘅科學家Christopher Britt，指呢個「？」其實係於10億光年外兩個正在旋轉碰撞嘅星系。Britt教授指出，如果仔細睇嘅話，可以見到「？」當中有兩點特別光，當中一點就係「？」嗰點，另一點就喺條曲線之中，呢兩點就係兩個星系嘅中心。而附近嗰啲發光嘅，就係星系碰撞時被捲出嘅物質所形成。

哥倫比亞大學嘅天文學家David Helfand則指出，由於類似嘅現象於浩瀚嘅太空中非常常見，所以只要有心搵，唔好講「？」，其他標點符號都一定可以搵到出黎。

Britt教授亦指出，其實太陽系所在嘅銀河系，都會於四十億年後與最近嘅仙女座星系發生碰撞，到時由遠方睇可能都會有類似嘅景象。

資料來源：NASA