人類嘅語言、用字會隨時代、社會環境而轉變，有啲曾經所有人都識嘅字，會慢慢被時代淘汰。就例如你依家仲用個「潮」字，只會證明你個人好「唔潮」咁解。近日日本網站Ranking.goo就做咗個網上票選，要求一眾「三字頭」嘅網友，選出「二字頭年輕人聽唔明嘅電腦．IT用語 (死語)」，換言之如果十個字你都聽過甚至仲用緊，你年紀就有返咁上下啦！各位準備好接受呢個殘酷現實未呢？

藍畫面

由於係日本嘅票選，所以啲用字都係日本名詞。好似第十位嘅「ビジー状態」，直譯為「Busy狀態」，其實就即係我哋講嘅「藍畫面」，大概係因為近代電腦、軟件機體強勁，已經唔太會出現因為指令太多而停止嘅情況，所以年輕人唔識。而7、8、9位都同已經被淘汰嘅電腦週邊有關，分別為「SCSI (接口)」 (即係已經駁Printer，好長好多針嗰個接口)；「MOディスク」磁光碟，即係當年Sony MD嘅前身；以及「有球滑鼠」，當年上電腦堂你一定拆過個波出黎玩嗰隻。而第六位就係「アスキーアート」 (ASCII Art)，即當年電腦及網絡都未能處理圖片時，利用ASCII文字「砌」出圖案嘅技巧。

磁碟，左起為8吋、5又1/4吋以及最為流行嘅3.5吋磁碟

第五位「みかか」就係日本專用，因為佢其實係日本電信電話「NTT」於鍵盤上對應嘅平假名輸入，情況即係你想打「HI」但打咗「竹戈」出黎咁解；第四位「MS-DOS」就係1981年由微軟推出嘅作業系統，純粹因為年代久遠所以依家冇人會用。

進入前三，第三名「起動ディスク・起動フロッピー」亦即「Boot機碟」，顧名思義就係當年電腦開機時需要用到、載有電腦作業程式嘅光碟。而第二名「ダイヤルアップ接続」撥號上網就可以話係我呢代人嘅集體回憶。於寬頻上網流行之前，電腦係用屋企條電話線上網，期間會佔據電話線不能通話，拎起電話仲會聽到特定嘅撥號音效。而「死語」第一名就係「フロッピーディスク」Floppy Disc，亦即年輕人口中嘅「Save掣」，同樣係因為被淘汰而「失傳」。

以上十個「電腦．IT」死語，你又識幾多個？用過、見過幾多個？

資料來源：Rankinggoo