受惠於SpaceX公司Starlink衛星網路系統，一個與世隔絕亞馬遜原始部落去年9月成功接通網絡，然而唔少村民彷彿打開了新世界大門，終日沉迷色情影片及社交媒體，變得懶散不肯打獵。

據外媒《The New York Times》報導，位於亞馬遜森林伊圖伊河（Ituí River）附近嘅原始部落Marubo大約有2000人口，擁有自己嘅語言及習俗，村民會服用死藤水與森林之靈連結，並會誘捕蜘蛛猴煮湯或當成寵物，與世隔絕生活超過數百年。

部落於去年9月透過Starlink衛星網路系統接上網絡，原意係希望當村民被毒蛇咬傷，或遇上緊急情況時，能夠立即聯絡有關當局救援。然而村內年輕人卻因此沉默網絡，甚至開始學習白人嘅生活方式，變得懶散只係識玩電話，唔再打獵、捕魚、務農，亦唔再同屋企人交流。有部落年輕男子更於彼此群組內分享色情圖片及影片，並嘗試模仿過激性行為。對於一個連公開接吻都唔允許嘅保守部落嚟講，確實係一大衝擊。

長老們因為擔心部落歷史及文化消失，目前已限制村民上網時間，只有早上2小時、晚上5小時及星期日全天開放網絡。