以摩打推動嘅外骨骼協助人類活動並唔係啲咩最新科技，不過以往外骨骼技術主要用於醫療、工業或軍事之上，一般民眾接觸到嘅機會不多。日前戶外用品品牌「Arc’teryx」（香港有時俗稱為「不死鳥」）就宣佈會推出面向民眾嘅外骨骼行山褲「MO/GO」，號稱能夠令用家嘅體感重量減輕30磅，售價方面則高達5000美金（約HK$3.9萬），唔知各位行山人士又有冇興趣？

「MO/GO」係由Arc’teryx與沿自Google X Lab嘅「Skip」合作推出。睇相最搶眼嘅當然係位於用家雙膝外則嘅外骨骼，但其實外骨骼係透過條褲內嘅碳纖環固定於用家雙腿，而外骨骼嘅電池亦位於條褲嘅腰間位置，所以實際產品其實係一條「可以裝上外骨骼嘅行山褲」。據Skip指「MO/GO」能夠透過用家嘅雙腿活動判定目前係行走於平面定係登山、下山，再提供適當嘅協助，例如發力上山，或吸收下山時嘅衝擊等。用家亦可以隨時控制「MO/GO」提供嘅輔助力度，最高可以令用家體感上減輕30磅。Skip亦指出「MO/GO」並非為咗畀行山人士「出貓」而設，而係「方便未必有足夠體力去登山——特別係有挑戰性嘅山——嘅人士都可以享受登山嘅樂趣。」

據報「MO/GO」總重7磅，電池續航力則為3小時，換言之難以靠佢全程輔助你行完一座山。另外高達$5000美金（早鳥優惠$4500美金）嘅售價亦表明佢非為普通休閒行山人士而設。「MO/GO」最快會於2025後半年出貨，屆時Arc’teryx亦會於美國及加拿大推出$80美元嘅租借方案，供有興趣人士試用。

資料來源：Arc'teryx Academy