無論你係同伴侶同居，又或係同朋友、同學一齊住Hall，生活習慣嘅上磨合往往係當中最大嘅難關。而其中一個最容易嘈交嘅小事，就係你較鬧鐘起身，但自己又一直唔醒，結果反而嘈醒咗其他人。而近日於日本網絡引起熱話嘅「枕頭底震動鬧鐘」，或者可以幫你解決呢個問題啦。

話說早前有個日本X用家貼出呢個「震動鬧鐘」，並表示自己嘅房間牆壁比較薄，所以唔可以用太大聲嘅鬧鐘，但佢個人又比較難醒，所以即使較三、四個鬧鐘都經常唔知醒。但用咗呢個震動鬧鐘（加手機上嘅鬧鐘）之後，就無試過瞓過籠。後來佢亦補充，呢個鬧鐘主要係放喺枕頭底下使用，夠鐘就會發出震動將用家叫醒，而且可以設定多個鬧鐘，減低用家「翻瞓」嘅機會。唯一問題就係個鬧鐘嘅時間會有偏差，定期就會重新設定一次。

或者係因為好多日本人都被呢個問題困擾，所以帖文好多就成為日本網絡熱話之一，到撰文之時已經有超過330萬次觀看、3.3萬個讚好。順帶一提，日本似乎有唔止一個類似嘅震動鬧鐘，所以有興趣嘅大家唔一定要買呢款。