任天堂將會推出Switch後繼機已經係人所共知嘅事實，問題係呢部「Switch 2」究竟有咩改進、同Switch有咩唔同？近日X（Twitter）上就流傳一堆據說係Switch 2嘅3D模擬圖及機殼實體圖，從中可以睇出Switch 2嘅新設計。

據X上流傳嘅圖片，Switch 2嘅外型、按鈕佈局，I/O位置等都同Switch OLED大致一樣，最明顯嘅就係因為螢幕大小從7吋增大成8吋，所以整部機睇落變得更長，但目前就唔知道個Mon係用LCD定OLED面板。最大嘅差別其實在於兩邊JoyCon控制器上，從圖中可見JoyCon連接主機嘅部份變得更加突出，唔太可能好似Switch咁「滑」入部主機到，亦印證早前傳聞指Switch 2嘅JoyCon會用新嘅磁吸固定方法，換言之新JoyCon好可能係「插」入部機兩側。另外JoyCon單邊使用時嘅SL及SR掣亦變得更大更突出，中間仲有個USB-C接孔，目前未知係用黎連接主機，定係有其他用途。

最後，Gizmochina亦指任天堂有意改進JoyCon上嘅「蘑菇頭」以改善「飄移」問題，甚至有可能直接以觸控板取代。

性能方面目都只係靠估。有報導指出Switch 2會由目前嘅4GB Ram大增至12GB，但處理器目前就沒有任何情報，所以Switch 2嘅運算能力、畫面質素及續航行目前都仲係個謎。但考慮到對家PS5及Xbox Series X都推緊4k畫質60fps，相信Switch 2應該能夠做到主機模式（即係插落個座之後）穩定輸出1080p、60fps嘅程度。

考慮到Switch 2實際上嘅改進並唔係好大，所以其售價應該（強調，「應該」）唔會同OLED版Switch相距大遠，亦即大約350美金左右。

資料來源：Gizmochina 1、2