如果你知道咩係「錄影帶」、「錄影機」，甚至仲用親自用過黎錄低心愛嘅電視節目仲自己飛埋廣告，咁你好可能已經唔太後生。但同黑膠唱片一樣，錄影帶呢個技術雖然舊，其實仲未被完全淘汰，反而成為懷舊收藏嘅其中一種。就連新電影都會特別推出錄影帶版本。好似今年暑假先上映嘅《Alien: Romulus》就係其中之一啦。

導演Fede Alvarez日前於洛杉磯嘅「Beyond-Fest」電影節上公佈，《Alien: Romulus》將於12月3日發行DVD等家用版本，其中就為咗紀念《Alien》系列上映45週年而推出嘅VHS錄影帶特別版。顧名思義，呢個特別版就係用VHS錄影帶為載體，唔單止真係可以放入錄影機播放，畫面比例亦特登調較成4:3，方便大家用以前嘅「大牛龜」電視觀看。

另外特別版嘅錄影帶盒，就用上海報設計師Matt Ferguson為電影設計嘅海報。據佢講，今次更係自2006年以黎首次有大型電影公司為旗下電影推出錄影帶版本。

在 Instagram 查看這則貼文

Matt Ferguson（@mattfergusonartist）分享的貼文

要注意嘅係，雖然講到明係限量版，但無論係Fede Alvarez定20th Century Studio都無公佈將會發行幾多餅帶，目前亦唔知售價係幾多。或者要到正式發售時大家先知個收藏價值啦。

資料來源：The Verge