唔少人都期望AI能夠大幅改善人類生活，但到目前為止嘛…唔計搵J圖容易咗的話，AI最幫得手嘅大概就係幫學生做功課？不過近日有間美國初創公司，推出咗一個馬桶鏡頭，據稱能夠利用AI技術偵測你嘅腸道健度以至飲得夠唔夠水等身體狀況，如果成功推行，可能係目前最「實用」嘅AI使用方式？

話說美國德州Austin有間初創公司「Throne」，推出咗一個同樣叫做「Throne」嘅馬桶鏡頭。「Throne」能夠安裝於廁板與馬桶瓷盤之間，並帶有一個向下嘅鏡頭——冇錯！「Throne」嘅目的其實係去影低你嘅便便，並利用「由醫生訓練」嘅「人工腸道智慧」分析你嘅便便到底健唔健康，並向你作出健康建議。同時「Throne」亦可以分析用家小便嘅「微妙變化」，以確認你飲得夠唔夠水。

喺個馬桶入面裝鏡頭，固然會引起唔少人嘅擔憂同疑問。「Throne」嘅官網及使用細則就表明佢哋只會拍攝馬桶「內容物」嘅照片，同時收集到嘅照片都會匿名化，而且唔會收集任何個人資料，同時系統亦會自動刪去任何同「排泄物」無關嘅照片，以保障用家嘅私隱。如果你都有興趣試試佢呢，「Throne」目前做緊特價，由原價$499美金降至$299，但就要到明年春天先可以發貨。

資料來源：Techcrunch、Throne