繼M4 iMac後，Apple於昨晚正式推出全新Mac mini，機身僅5x5吋比上代縮小一半有多，卻搭載性能強大嘅M4或M4 Pro晶片，以應付更繁重嘅工作量。

全新Mac mini機身經過重新設計，體積不到上代嘅一半，並採用全新散熱架構，將空氣引導至內部不同層次，再統一由底下嘅出風口排出，讓各區域保持在最佳工作溫度。連接埠方面，新Mac mini正面設有2個支援 USB 3(速度最高可達 10Gb/s)嘅USB-C接口以及一個3.5mm耳機孔，而背面則有3個Thunderbolt 4接口(M4 Pro機型為3個Thunderbolt 5接口)、一個HDMI接口以及一個10Gb Ethernet接口。值得一提嘅係，唔知Apple係覺得用家唔使經常關關機，定還是機身太過緊湊，而將開機掣從上代嘅背面改成置於機身底部，換言之每次開機都要拎一拎起部機撳掣。

硬件效能方面，新Mac Mini分別有M4及M4 Pro晶片兩個版本，其中M4晶片版具備10核心CPU、10核心GPU以及16核心神經網絡引擎，RAM由16GB起跳，最高可以升級至32GB。針對專業效能用家而設嘅M4 Pro晶片則具備12核心CUP、16核心GPU與14核心CPU、20核心GPU兩個配置可選，RAM由24GB起跳，最高可升級至64GB。

全新Mac mini由即日起開放預訂，11月8日正式發售，M4版本售價由HK$4,599起，M4 Pro版本則由HK$10,599起。