Call機曾經係一眾日理萬機人仕必備嘅通訊裝置，不過隨住手提電話嘅興起，Call機被時代淘汰，近年已經變成收藏品級嘅「文物」。但黎緊你就好可能會見到一場「Call機復興」，事關近來有日本廠商推出一款針對年輕小女孩、只用「顏文字」或「Emoji」聊天嘅通訊裝置，明眼人一睇就知係「潮版」Call機！

話說日本SEGA旗下嘅SEGA Toys，早前推出咗針對小女生族群嘅「emojam」。「emojam」係一部顏色鮮艷、造型可愛嘅「顏文字訊息裝置」，換言之用家們只能透過選擇內置嘅顏文字或Emoji溝通，每條訊息最多可以用10個顏文字，用戶亦可以創建最多五個人嘅聊天室，切合小女生鍾意圍埋一齊講秘密嘅需求。另外用家亦可以將內置顏文字合成組成新顏文字，亦內置聊天AI，就算你冇朋友都一樣有「人」同你傾計。

日本小女生們鍾唔鍾意呢部機呢我就唔知，但日本好多大叔見到之後就非常鍾意，覺得emojam既因應時代改變而進行更新、又能夠懷緬過去使用Call機嘅回憶。或者不久嘅未來大家就會見到一班日本大叔拎住呢部糖果色嘅玩具互相聯絡？

資料來源：SEGA Toys