Marvel電影《美國隊長：勇敢新世界》（美隊4）上個星期三率先於港澳台地區上映，相信唔少人都已經親自入場睇完，又或睇過影評知道評價並不好。不過《美隊4》於美國本土就要遲兩日，即情人節當天先上映，所以美國方面嘅評價、票房數字同樣亦黎得較遲。咁你話外國影迷對呢位新美國隊長嘅觀感，會唔會同香港嘅觀眾有唔同呢？

咁就視乎你用「票房」定「口碑」黎做評定準則啦。從票房黎睇，《美隊4》表演其實係唔錯嘅。據Box Mojo網站上嘅數字，《美隊4》於美國本土嘅首日票房約為4000萬美金，雖然同上一部MCU作品《Deadpool and Wolverine》首日收9600萬美金相距甚遠，但其實亦拋離《The Marvels》、《Eternals》、《尚氣》等近年作品。外媒更指出其首週票房可能達到8200至8400萬美金，即係同《Black Widow》及第一集《Doctor Strange》差唔多。

圖片：RottenTomatoes

圖片：CinemaScore

但你講到口碑啦喎…雖然《美隊4》於指標性網站Rotten Tomatoes嘅觀眾評分依然有80%，但專業評分就僅得51%，僅高於MCU史上評分最低嘅《Ant-Man and The Wasp: Quantumania》（46%）以及《Eternals》（47%），比起《The Marvels》嘅62%都仲要低。另一電影評分網站CinemaScore於收集入場觀眾嘅評分後，將《美隊4》評為「B-」，比起上述提過嘅另外三部電影（拎B）更低，成為MCU有史以黎評價最差電影。兩者均表示《美隊4》嘅評價並不如理想。

口碑唔好固然會影響觀眾後續入場意願，所以有媒體分析指，雖然《美隊4》首日票房不俗，但最終票房應該唔會太亮眼。

資料來源：Box Mojo、Rotten Tomatoes、CinemaScore、Comicbookmovie